غزہ میں امداد کی فراہمی کی قرارداد کے حق میں ووٹ نہ دینے کا مودی سرکار کا فیصلہ شرمناک ہے، پریانکا

بھارتی اپوزیشن جماعت کانگریس کی رہنما اور اپوزیشن لیڈر راہول گاندھی کی بہن پریانکا گاندھی نے غزہ میں انسانی امداد کی فراہمی کی قرارداد کے حق میں ووٹ نہ دینے پر  حکومت کو آڑے ہاتھوں لے لیا۔

پریانکا گاندھی نے ایک بیان  میں غزہ میں انسانی امداد کی فراہمی کی قرارداد کے حق میں ووٹ نہ دینے کے بھارتی حکومت کے فیصلے کو  شرمناک  قرار دیا۔

انہوں نے کہا کہ غزہ میں بچوں اور خواتین سمیت 60 ہزار  فلسطینیوں کے قتل کے بعد انسانی امداد کے حق میں ووٹ نہ دینا شرمناک ہے اور بھارتی حکومت کا فیصلہ اس ملک کی سامراج مخالف پالیسی سے انحراف ہے۔

ان کا کہناتھا کہ اسرائیلی وزیراعظم نیتن یاہو  فلسطینی قوم کو صفحہ ہستی سے مٹارہا ہے اور  مودی سرکار  اس پر جشن منا رہی ہے۔

پریانکا گاندھی نے مودی سرکار  پر شدید تنقید کرتے ہوئے کہا کہ بھارت اپنے اصولوں اور بین الاقوامی اقدار کے خلاف جاتے ہوئے اسرائیل کے ایران پر  حملے اور  عسکری قیادت کے قتل پر خوشی کا اظہار کر رہا ہے جو انتہائی مایوس کن ہے۔