22 جون ، 2025 
امریکی حملے عالمی قوانین کی سنگین خلاف ورزی ہیں: وزیراعظم کی ایرانی صدر سے گفتگو
22 جون ، 2025
وزیراعظم شہباز شریف نے ایرانی صدر مسعود پزشکیان کو ٹیلیفون کرکے ایرانی جوہری تنصیبات پر امریکی حملوں کی شدید مذمت کی ہے۔
وزیراعظم شہباز شریف نے حملوں کو عالمی جوہری توانائی ایجنسی کے قانون اور دیگر بین الاقوامی قوانین کی سنگین خلاف ورزی قرار دیا اورکہا کہ امریکی حملوں میں ان تنصیبات کونشانہ بنایا گیا جو عالمی جوہری توانائی ایجنسی کے تحفظات کے تحت تھیں۔
انہوں نے کہا کہ اقوام متحدہ کے چارٹر کے آرٹیکل 51 کے تحت ایران کو دفاع کا حق حاصل ہے۔
وزیراعظم نے امن کیلیے فوری مذاکرات اور سفارتکاری کی ضرورت پر زور دیا اور کہاکہ مذاکرات اور سفارتکاری ہی آگے بڑھنے کا واحد قابل عمل راستہ ہے۔
دونوں رہنماؤں نے اس نازک موڑ پرامت کے درمیان اتحاد قائم کرنے کی ضرورت پر زور دیا۔
شہباز شریف نے ایرانی عوام اور حکومت کیساتھ پاکستان کی غیر متزلزل یکجہتی کا اعادہ کیا اور قیمتی جانوں کے ضیاع پر تعزیت کی اور زخمیوں کی جلد صحتیابی کی دعا کی
ایرانی صدر مسعود پزشکیان نے پاکستان کی حمایت کو سراہتے ہوئے ایرانی عوام اور حکومت کے ساتھ اظہار یکجہتی پر وزیراعظم شہباز شریف کا شکریہ ادا کیا، ایرانی صدر نے حکومت،عسکری قیادت اور پاکستانی عوام سے بھی تشکر کا اظہار کیا۔
