پاکستان سپر لیگ ( پی ایس ایل) کے ساتویں ایڈیشن کے پہلے مرحلے کے میچ میں اسلام آباد یونائیٹڈ نے کراچی کنگز کو  یکطرفہ مقابلے کے بعد 42رنز سے شکست دے دی۔

178 رنز کے ہدف کے تعاقب میں کراچی کنگز  نے مقررہ 20 اوورز میں 9 وکٹوں کے نقصان پر 135رنز بنائے، محمد نبی47 رنز بناکر نمایاں رہے۔

واضح رہے کہ کراچی کنگز کی ایونٹ میں یہ مسلسل پانچویں ناکامی ہے۔

نیشنل اسٹیڈیم کراچی میں کھیلے گئے میچ میں اسلام آباد یونائیٹڈ کے کپتان شاداب خان نے ٹاس جیت کر پہلے بیٹنگ کا فیصلہ کیا۔

اسلام آباد نے مقررہ20 اوورز میں6  وکٹوں پر 177 رنز بنائے، پال اسٹرلنگ 39 رنز بناکر نمایاں رہے۔

اسلام آباد یونائیٹڈ کی اننگز

اسلام آباد کی اننگز کا آغاز اچھا رہا اور اوپنر ایلیکس ہیلز اور پال اسٹرلنگ کے درمیان 66 رنز کی شراکت داری قائم ہوئی۔

تاہم ہیلز 21 گیندوں پر 30 رنز بناکر آؤٹ ہوگئے، اسلام آباد کو دوسرا نقصان سیٹ بیٹر پال اسٹرلنگ کی صورت میں اٹھانا پڑا، وہ 39 رنز بناکر پویلین لوٹے۔

2 وکٹیں گرنے کے بعد کپتان شاداب خان اور کولن منرو کے درمیان 55 رنز کی شراکت بنی جس نے ٹیم کا مجموعی اسکور 130 رنز تک پہنچایا تاہم شاداب 19 گیندوں پر 34 رنز بناکر آؤٹ ہوگئے۔

اس کے علاوہ  منرو 33 اور آصف علی 10 رنز بناسکے جبکہ اعظم خان اور فہیم اشرف رنز بناکر ناٹ آؤٹ رہے۔ 

کراچی کی جانب سے کرس جارڈن نے 2 جبکہ عماد وسیم، عثمان شنواری ، عمید آصف اور محمد نبی نے ایک ایک وکٹ حاصل کی۔

کراچی کنگز کی اننگز

178 رنز کے ہدف کے تعاقب میں کراچی کنگز کا آغاز بالکل اچھا نہ رہا اور صرف 6 رنز کے مجموعی اسکور پر جارح مزاج بیٹر شرجیل خان 6 رنز بناکر رن آؤٹ ہوگئے، جس کے بعد کپتان بابر اعظم بھی بڑا اسکور کرنے میں ناکام رہے اور 8 رنز بناکر پویلین لوٹ گئے۔

کراچی کو تیسرا نقصان ای این کوکبین کی صورت میں اٹھانا پڑا، وہ صرف 2 رنز بناکر ٹیم کا ساتھ چھوڑ گئے جبکہ صاحبزادہ فرحان 25 رنز بناسکے۔

اس کے علاوہ کیوس جارجی 15 اور عماد وسیم 9 رنز بناکر آؤٹ ہوئے۔

83 رنز پر 8 وکٹیں گرنے کے بعد محمد نبی نےتھوڑی مزاحمت کی لیکن وہ بھی کراچی کنگز کو ایونٹ میں پہلی کامیابی دلوانے میں ناکام رہے،نبی 47 رنز بناکر ناٹ آؤٹ رہے۔

اسلام آباد کی جانب سے کپتان شاداب خان نے ایک بار پھر شاندار بولنگ کا مظاہرہ کیا اور 4 وکٹیں حاصل کیں۔

شاداب خان پی ایس ایل میں 3 لگاتار میچز میں 4 وکٹیں حاصل کرنے والے پہلے بولر بن گئے ہیں۔

اس کے قبل شاداب نے کوئٹہ گلیڈی ایٹرز کے خلاف 5 اور گزشتہ روز لاہور قلندرز کے خلاف 4 وکٹیں حاصل کی تھیں۔

اس کے علاوہ وہ رواں پی ایس ایل میں اب تک سب سے زیادہ وکٹیں لینے والے بولر بھی ہیں، انہوں نے 5 میچز میں 14 وکٹیں حاصل کیں۔

پوائنٹس ٹیبل کی بات کی جائے تو ملتان سلطانز پہلے اور اسلام آبادیونائیٹڈ 5 میں سے 3 میچز جیت کر 6 پوائنٹس کے ساتھ دوسرے جبکہ لاہور قلندرز تیسرے نمبرپر موجود ہے ْ

واضح رہے کہ کراچی کنگز کی ٹیم اب تک کوئی میچ جیتنے میں کامیاب نہیں ہوئی۔