کشمیری حریت رہنماء یاسین ملک کی اہلیہ مشال ملک نے تحریک آزادی کشمیر کے لیے آئندہ ماہ خواتین موومنٹ کی تحریک چلانے کا اعلان کر دیا

مشال ملک کہتی ہیں کہ کشمیر کی آزادی کے لیے پاکستان اور آزاد کشمیر کے گلی گلی اور کوچہ کوچہ جاؤں گی ۔

اسلام آباد میں حریت رہنماء آسیہ اندرابی کو خراج تحسین پیش کرنے کے لیے منعقدہ سیمینار سے خطاب میں مشال ملک نے بتایا کہ ان کی تحریک غیر سیاسی ہو گی ۔

انہوں نے کہا کہ موومنٹ میں خواتین کو کہوں گی کہ مسئلہ کشمیر کے لیے آواز اٹھائیں،پاکستان اور کشمیری عوام مل کر ہی کشمیر کو آزاد کروا سکتے ہیں۔

سیمینار میں شریک خواتین اراکین قومی اسمبلی اور انسانی حقوق کے لیے کام کرنے والی تنظیموں کے نمائندوں نے مطالبہ کیا کہ بھارت مقبوضہ کشمیر میں ظلم و تشدت اور انسانی حقوق کی خلاف ورزیاں فوری طور پر بند کرے۔

ان کا یہ بھی کہنا تھا کہ اقوام متحدہ ابھی تک اپنی قراردوں پر عمل درآمد نہیں کرا سکا ہے۔