انسداد دہشت گردی کی عدالت نے پاکستان تحریک انصاف کے چیرمین عمران خان اور پاکستان عوامی تحریک کے سربراہ علامہ طاہر القادری کی جائیدادوں کو ضبط کرنے کا حکم دے دیا۔

اسلام آباد کی انسداد دہشت گردی کی عدالت نے دھرنے کے دوران ریڈ زون میں توڑ پھوڑ، سرکاری ٹی وی پر حملے اور ایس ایس پی کو زخمی کرنے کے الزام کے مقدمے میں عمران خان اور ڈاکٹر طاہر القادری کی جائیداد کی قرقی کا حکم دے دیا۔

عدالت نے مقدمے میں عمران خان اور طاہرالقادری کو اشتہاری قرار دیا اور متعلقہ تھانے کے ایس ایچ او کو آئندہ سماعت پر دونوں کو پیش کرنے کا حکم دیا۔

جب کہ عدالت نے جائیداد کی قرقی کے لیے پولیس اور ریونیو ڈپارٹمنٹ کو بھی نوٹسز جاری کردیئے ہیں۔

واضح رہے کہ اگست 2014 میں تحریک انصاف اور پاکستان عوامی تحریک نے عام انتخابات میں مبینہ دھاندلی کے خلاف دھرنا دیا تھا جس کے دوران دونوں جماعتوں کے کارکنان نے پولیس رکاوٹیں توڑ کر وزیراعظم ہاؤس میں گھسنے کی کوشش کی تھی جس سے پارلیمنٹ ہاؤس کے گیٹ کو بھی نقصان پہنچا تھا۔

جب کہ مشتعل کارکنان اور پولیس کے درمیان تصادم میں  3 افراد جاں بحق 560 سے زائد زخمی ہوگئے تھے۔