19 جولائی ، 2017 
پاناما کیس میں وزیراعظم کو بھولا بھالا کر کے پیش کیا جارہا ہے، سراج الحق
19 جولائی ، 2017
امیر جماعت اسلامی سراج الحق کا کہنا ہے کہ پاناما کیس میں وزیراعظم کو بھولا بھالا کر کے پیش کیا جارہا ہے۔
پاناما کیس کی سماعت ملتوی ہونے کے بعد سپریم کورٹ کے باہر میڈیا سے بات کرتے ہوئے سراج الحق کا کہنا تھا کہ پاناما کیس کی سماعت کے دوران آج بھی شریف خاندان کے وکلا کے پاس کوئی دلائل نہیں تھے تاہم وزیراعظم کو بھولا بھالا کر کے پیش کیا جارہا ہے۔
سراج الحق نے کہا کہ آج عدالتیں آزاد ہیں اور پوری قوم سپریم کورٹ کی پشت پر ہے، کیا پاکستان میں آئندہ جمہور کی حکمرانی ہوگی یا بادشاہت کی اس کا پتا چل جائے گا۔
امیر جماعت اسلامی نے کہا کہ وزیرخزانہ اسحاق ڈار نے قوم کے خزانے کو خالی کردیا ہے جب کہ پاناما کیس میں شریف خاندان کے وکلا کمزور کیس پیش کر رہے ہیں۔
سراج الحق نے کہا کہ ہماری خواہش ہے کیس ایک ہفتے میں مکمل ہو اور قوم کو جلد خوشخبری ملے، اگر آرٹیکل 62 اور 63 کی روشنی میں پاناما کیس کا فیصلہ آیا تو یہ لوگ نااہل ہوجائیں گے۔
