صبا قمر کی فلم ’ہندی میڈیم‘ اب چین میں بھی رنگ جمائے گی

پاکستانی اداکارہ صبا قمر اور اداکار عرفان خان کی فلم ’ہندی میڈیم‘ بھارت میں کامیابی کے بعد اب چین میں بھی نمائش کے لیے پیش کی جائے گی۔

صبا قمر نے بالی وڈ میں اپنے کیریئر کا آغاز گزشتہ برس اداکار عرفان خان کے مدمقابل فلم ’ہندی میڈیم‘ سے کیا تھا۔

ہندی میڈیم میں دونوں کی اداکاری کو خوب پسند کیا گیا، فلم نے باکس آفس پر بھی دھوم مچائی اور 70 کروڑ سے زائد کا بزنس کرکے سپر ہٹ کہلائی۔

فلم نے مشہور ’فلم فیئر ایوارڈز‘ میں بہترین فلم و بہترین اداکار کے ایوارڈز بھی اپنے نام کیے جبکہ صبا قمر نے بہترین اداکارہ کے طور پر نامزدگی حاصل کی تاہم وہ ایوارڈ ان کے نام نہ ہوسکا۔

فلم فیئر ایوارڈز: صبا قمر کی’ہندی میڈیم‘ بہترین فلم قرار

بہترین اداکار کا ایوارڈ عرفان خان کو دیا گیا جو فلم 'ہندی میڈیم' میں صبا قمر کے ساتھی اداکار تھے۔

بالی وڈ میں کامیابیاں سمیٹنے کے بعد فلمسازوں نے اب ہندی میڈیم کو اپریل میں چین میں بھی نمائش کے لیے پیش کرنے کا فیصلہ کیا ہے۔

فلم کو چینی زبان میں ڈب کرکے 4 اپریل کو ریلیز کیا جائے گا جو رواں سال عامر خان کی ’سیکرٹ سپر اسٹار‘ اور سلمان خان کی ’بجرنگی بھائی جان‘ کے بعد چین میں ریلیز ہونے والی تیسری بالی وڈ فلم ہوگی۔

فلم کا چینی زبان میں تشہیری پوسٹر بھی جاری کردیا گیا ہے جسے سوشل میڈیا پر بے حد پسند کیا جارہا ہے۔