24 اپریل ، 2018 
عتیق قتل کیس: امریکی سفارتکار کرنل جوزف کا نام بلیک لسٹ میں شامل
24 اپریل ، 2018
اسلام آباد میں گاڑی کی ٹکر سے نوجوان کی جان لینے والے امریکی سفارت کار کرنل جوزف کانام بلیک لسٹ میں شامل کرلیا گیا۔
وفاقی حکومت نے اسلام آباد ہائیکورٹ میں جواب جمع کرادیا جس میں بتایا گیا ہے کہ امریکی ملٹری اتاشی کرنل جوزف کا نام بلیک لسٹ میں شامل کرلیا گیا ہے۔
ڈپٹی اٹارنی جنرل راجا خالد نے عدالت کو بتایا کہ امریکی سفارت خانے کے دفاعی اتاشی پاکستان نہیں چھوڑ سکتے، کرنل جوزف کو سفارتی استثنا حاصل ہے اس لیے ان کی گرفتاری ہوسکتی ہے اور نہ ہی ٹرائل کیا جا سکتا ہے۔
ڈپٹی اٹارنی جنرل نے عدالت کے روبرو مزید کہا کہ آفیشل ڈیوٹی کے دوران حادثے کی صورت میں ویانا کنونشن سفارتکاروں کو استثنیٰ دیتا ہے جب کہ سفارتکار کا نام ای سی ایل میں شامل کرنا طویل عمل ہے۔
ڈپٹی اٹارنی جنرل نے کہا کہ اگر کوئی سفارتکار اپنا استثنیٰ واپس لے لیتا ہے تو پھر ٹرائل کیا جاسکتا ہے۔
عدالت نے قرار دیا کہ عتیق بیگ قتل کیس میں وزارت خارجہ عدالتی سوالنامے کے جوابات دے۔
یاد رہے کہ 7 اپریل کی سہ پہر تین بجے اسلام آباد کے علاقے دامن کوہ کے قریب امریکی ملٹری اتاشی کرنل جوزف نے سگنل توڑتے ہوئے موٹر سائیکل پر سوار دو افراد کو روند دیا تھا۔
امریکی اہلکار کی گاڑی کی ٹکر سے عتیق بیگ نامی نوجوان جاں بحق اور اس کا کزن شدید زخمی ہوگیا تھا۔
واقعے کا مقدمہ تھانہ کوہسار میں درج کیا گیا جس کے مطابق سفارتکار نے سگنل کی خلاف ورزی کرتے ہوئے موٹرسائیکل کو ٹکر ماری، موٹر سائیکل سوار عتیق بیگ اپنے کزن کے ہمراہ ایف ایٹ سے مارگلہ روڈ کی طرف آرہا تھا کہ دامن کوہ چوک پر سفید رنگ کی گاڑی نے سرخ سگنل توڑتے ہوئے کچل ڈالا۔
