ترک صدر کا سعودی عرب سے صحافی کے قونصل خانہ چھوڑنے کے شواہد پیش کرنے کا مطالبہ

ترک صدر رجب طیب اردوان نے سعودی عرب سے مطالبہ کیا ہے کہ مبینہ طور پر لاپتہ ہونے والے سعودی صحافی کے قونصل خانہ چھوڑنے کے شواہد پیش کیے جائیں۔

استبول میں واقع سعودی قونصل خانے سے مبینہ طور پر گزشتہ ہفتے سعودی صحافی جمال خاشقجی لاپتہ ہو گئے تھے۔

ترک پولیس نے شبہ ظاہر کیا تھا کہ سعودی صحافی کو قتل کر دیا گیا ہے تاہم سعودی قونصل خانے نے اس الزام کی سختی سے تردید کی تھی۔

ترکی نے گزشتہ روز اس معاملے پر وضاحت کے لیے سعودی سفیر کو کو طلب بھی کیا تھا۔

صحافی کی پراسرار گمشدگی: ترکی نے سعودی سفیر کو طلب کرلیا

صحافی خاشقجی کو سعودی قونصل خانے میں قتل کر دیا گیا ہے، ترک حکام کا دعویٰ

ترک صدر رجب طیب اردوان نے بھی کہا تھا کہ وہ اس معاملے کو خود دیکھ رہے ہیں۔

طیب اردوان کا کہنا تھا کہ قونصل خانے کا عملہ صرف یہ کہہ کر نہیں بچ سکتا کہ جمال خاشقجی نے قونصلیٹ چھوڑ دیا تھا، کیا ان کے پاس کیمرے نہیں تھے؟

انہوں نے سعودی حکام سے مطالبہ کیا کہ اگر ان کے پاس سعودی صحافی کے قونصل خانے سے باہر جانے کے شواہد موجود ہیں تو پیش کیے جائیں۔