09 نومبر ، 2018 
'روحی بانو بالکل ٹھیک اور بھائی کے گھر پر ہیں'، بہن نے لاپتہ ہونے کی تردید کردی
09 نومبر ، 2018
لاہور: ماضی کی معروف اداکارہ روحی بانو کی بہن نے ان کے لاپتہ ہونے کی خبروں کی تردید کرتے ہوئے کہا ہے کہ وہ بالکل ٹھیک ہیں۔
واضح رہے کہ گذشتہ روز رپورٹس سامنے آئی تھیں کہ روحی بانو کو ایک سال قبل ان کی بہن نفسیاتی اسپتال 'فاؤنٹین ہاؤس' سے اپنے گھر لے گئی تھیں، جس کے بعد سے ان کے بارے میں کسی کو کچھ علم نہیں۔
روحی بانو نفسیاتی مرض شیزوفرینیا میں مبتلا ہیں اور فاؤنٹین ہاؤس میں علاج کے لیے آتی جاتی رہی ہیں، جہاں ایک کمرہ ان کے لیے ہمیشہ مختص رہتا ہے۔
تاہم آج سابق اداکارہ کی بہن روبینہ نے ان کے لاپتہ ہونے کی خبروں کی تردید کردی۔
روبینہ نے بتایا کہ روحی بانو بالکل ٹھیک اور بھائی کےگھر ہیں، جنہیں وہ جلد میڈیا سے ملوا دیں گی۔
ان کا مزید کہنا تھا کہ فاؤنٹین ہاؤس میں روحی بانو صرف علاج کرانے جاتی تھیں۔
واضح رہے کہ اعلیٰ تعلیم یافتہ اور صدارتی تمغہ برائے حُسن کارکردگی حاصل کرنے والی روحی بانو کئی برسوں سے نفسیاتی مرض اور مالی مسائل کا شکار ہیں۔
روحی بانو کی زندگی دکھوں سے بھری پڑی ہے۔ ازواجی زندگی میں بے سکونی کے ساتھ اکلوتے بیٹے علی کے قتل کے بعد سے گویا زندگی کی تمام رعنائیاں اُن سے چھِن گئیں اور فاؤنٹین ہاؤس روحی بانو کا مسکن بن گیا۔
لاہور کے علاقے گلبرک تھری میں روحی بانو کا اپنا گھر بھی ہے، جو کھنڈر میں تبدیل ہو چکا ہے۔
مزید خبریں :
پاکستانی گلوکار مجھ سے جلتے ہیں:چاہت فتح علی خان
3 گھنٹے پہلے
میرے نزدیک دوستی ضروری، شادی بیکار کام ہے: جاوید اختر
25 نومبر ، 2024
