طاہر داوڑکے قاتل یہاں ہوں یا افغانستان میں، انہیں انجام تک پہنچائیں گے: شہریار آفریدی

پشاور: وزیر مملکت برائے داخلہ شہریار آفریدی کا کہنا ہے کہ ایس پی طاہر خان داوڑ کی میت کی حوالگی کے حوالے سے افغان حکومت کی جانب سے اپنایا جانے والا رویہ تکلیف دہ تھا۔

پشاور میں خیبرپختونخوا پولیس کے ایس پی طاہر خان داوڑ کے بھائی اور دیگر حکام کے ہمراہ پریس کانفرنس سے خطاب کرتے ہوئے شہریار آفریدی نے کہا کہ وہ میت لینے کیلئے وزیراعظم عمران خان کی خصوصی ہدایت پر طورخم سرحد گئے لیکن جو رویہ طور خم باڈر پر دیکھا وہ تکلیف دے تھا۔

شہریارآفریدی نے کہا کہ ایسا رویہ کیوں اپنایا گیا افغان حکومت کو سوچنا ہوگا، ڈھائی گھنٹے ہمیں کھڑا کیا گیا پھر کہا کہ ہم پاکستان کو لاش نہیں دیتے۔

انہوں نے کہا کہ شہید ایس پی طاہر داوڑ کی لاش نہ دینے کا مقصد اس معاملے پر پاکستان میں انتشار پھیلانا تھا، افغان حکومت کے ساتھ معاملہ سفارتی سطح پر اٹھایئں گے۔

شہریار آفریدی نے کہا کہ افغان حکومت کا شہید کی لاش پر سیاست کرنے کا مقصد پاکستان میں انتشار پھیلانا تھا۔

انہوں نے کہا کہ ہر شہری کے تحفظ کی ذمہ داری ریاست کی ہے، طاہر داوڑ کے معاملے کو منطقی انجام تک پہنچائیں گے، دنیا میں سب سے زیادہ مہاجرین پاکستان میں ہیں، آج ہم پر 'ففتھ جنریشن وار' مسلط کی گئی ہے اس لیے مصدقہ اطلاع کے بغیر بات کرنا ٹھیک نہیں، جب مصدقہ اطلاع ملی تو پارلیمنٹ میں بھی بات کی اور میڈیا پر بھی۔

وزیر مملکت برائے داخلہ نے کہا کہ کل وزیراعظم ہاؤس میں اس معاملے پر اجلاس ہوگا۔

اس موقع پر طاہر داوڑ کے بھائی نے قاتلوں کے خلاف سخت کارروائی کا مطالبہ کیا جبکہ ترجمان کے پی حکومت اجمل وزیر نے کہا کہ افغان حکومت کے نمائندوں کے ساتھ مذاکرات ہوئے ہیں اور طورخم پر ہونے والے واقعات وزیراعظم کے نوٹس میں لائیں گے۔

'قاتل چاہے پاکستان میں ہوں یا افغانستان میں، منطقی انجام تک پہنچایا جائے گا'

قبل ازیں اسلام آباد میں اظہار خیال کرتے ہوئے وزیر مملکت برائے داخلہ شہریار آفریدی کا کہنا تھا کہ پشاور کے سپرنٹنڈنٹ پولیس (ایس پی) طاہر داوڑ کے قاتل چاہے پاکستان میں ہوں یا افغانستان میں، انہیں منطقی انجام تک پہنچایا جائے گا۔

واضح رہے کہ پشاور رورل کے ایس پی طاہر داوڑ اسلام آباد کے علاقے جی ٹین سے جمعہ 27 اکتوبر کو لاپتہ ہوئے تھے۔ جن کی لاش 13 نومبر کو افغانستان کے صوبہ ننگرہار سے ملی اور پھر افغان حکام کی جانب سے تصدیق کے بعد گذشتہ روز پاکستانی دفترخارجہ نے ان کے قتل کی تصدیق کی۔

سینیٹ اجلاس میں اظہار خیال کرتے ہوئے شہریار آفریدی کا کہنا تھا کہ طاہر داوڑ کا مسئلہ حساس تھا، لیکن ہم جوابدہ ہیں اور  اس واقعے میں ملوث عناصر کو نشان عبرت بناکر کیس کو منطقی انجام تک پہنچایا جائے گا۔

وزیر مملکت برائے داخلہ نے بتایا کہ طاہر داوڑ  2 خودکش حملوں میں بچے، انہیں اس سے قبل بھی دھمکیاں ملتی رہتی ہیں جبکہ ان کی بھابھی اور بھائی کو بھی شہید کیا جاچکا ہے۔

دفتر خارجہ نے ایس پی طاہر داوڑ کے قتل کی تصدیق کردی

افغان وزارت خارجہ کے مطابق لاش گزشتہ روز ننگر ہار صوبے کے ضلع دور بابا میں مقامی افراد کو ملی، ضروری کارروائی کے بعد میت کو جلال آباد میں واقع پاکستانی قونصل خانے کے سپرد کر دیا جائے گا۔

واقعے کی تفصیلات بتاتے ہوئے شہریار آفریدی نے کہا کہ '28 اکتوبر کو طاہر داوڑ کے لاپتہ ہونے کی ایف آئی آر ان کے بھائی فرحان الدین احمد کی مدعیت میں اسلام آباد کے تھانہ رمنا میں کاٹی گئی، جس کے بعد ان کی تلاش شروع ہوئی، لیکن تمام خفیہ اداروں اور سیکیورٹی اداروں کی جانب سے یہی بات سامنے آرہی تھی کہ طاہر داوڑ سے رابطہ نہیں ہو رہا اور انہیں ٹریس کیا جا رہا ہے'۔

انہوں نے بتایا کہ '13 نومبر کو سوشل میڈیا پر جب تصاویر آئیں تو افغانستان اور پاکستان میں کوئی ایسا ذریعہ نہیں تھا، جس سے تصدیق ہوسکے اور پھر 14 نومبر کو افغان حکومت نے طاہر داوڑ کے قتل کی تصدیق کی'۔

وزیر مملکت نے بتایا کہ 'ایس پی طاہر داوڑ کو اسلام آباد سے اغوا کرکے پنجاب کے شہر میانوالی لے جایا گیا اور پھر وہاں سے بنوں کے راستے انہیں افغانستان لے جایا گیا'۔

 شہریار آفریدی نے بتایا کہ 'طاہر داوڑ کا آخری پیغام گھر والوں کے لیے یہ تھا کہ میں محفوظ ہوں، پریشان نہ ہوں'۔

ایس پی داوڑ کا قتل: وزیراعظم کی کے پی حکومت کو اسلام آباد پولیس سے تعاون کی ہدایت

وزیر مملکت برائے داخلہ شہریار آفریدی کو ٹاسک دیا ہے کہ فوری طور پر معاملے کو دیکھیں اوررپورٹ پیش کریں، وزیراعظم

وزیر مملکت برائے داخلہ نے بتایا کہ افغان حکومت کی جانب سے طاہر داوڑ کے قتل کی تصدیق پر وزیراعظم عمران خان نے وزیراعلیٰ خیبرپختونخوا، آئی جی کے پی اور آئی جی اسلام آباد سے انکوائری رپورٹ مانگی ہے۔

ان کا کہنا تھا کہ 'یہ پہلا واقعہ نہیں ہے، کچھ عناصر پاکستان کو غیر مستحکم کرنے کی کوشش کر رہے ہیں'۔

وزیر مملکت کا کہنا تھا کہ 'افغان بارڈر سائیڈ پر پیٹرولنگ کا کوئی نظام نہیں ہے، جس پر افغان حکومت کو آگاہ کیا جاچکا ہے'۔

اس موقع پر شہریار آفریدی نے اسلام آباد میں سیف سٹی منصوبے کے تحت لگائے گئے کیمروں کی فعالیت پر بھی سوال اٹھایا اور کہا کہ '1800کے قریب کیمرے نصب کیے گئے لیکن کسی کیمرے میں یہ صلاحیت نہیں ہے کہ گاڑی کا نمبر یا کسی شکل کی تصدیق کرسکے'۔

انہوں نے سیف سٹی منصوبے کے تحت نصب کیے گئے کیمروں کی تحقیقات کا بھی مطالبہ کیا، تاکہ ذمہ داروں کے خلاف کارروائی کی جاسکے۔

سینیٹ اجلاس میں طاہر خان داوڑ کی مغفرت اور درجات کی بلندی کے لیے دعا بھی کی گئی۔