تنخواہوں میں اضافے کا نوٹیفکیشن جاری نہ ہونے پر سندھ میں ینگ ڈاکٹرز کا بائیکاٹ

کراچی: تنخواہوں میں اضافے کا نوٹیفکیشن جاری نہ کیے جانے کے خلاف سندھ کے سرکاری اسپتالوں میں ینگ ڈاکٹرز ایسوسی ایشن نے تمام اوپی ڈیز کا بائیکاٹ کردیا، جس کے باعث مریضوں کو مشکلات کا سامنا ہے۔

کراچی میں جناح، سول، این آئی سی ایچ، این آئی سی وی ڈی اور دیگر اسپتالوں میں ینگ ڈاکٹرز کی جانب سے او پی ڈیز کا بائیکاٹ کیا جارہا ہے۔

دوسری جانب سکھر، بدین، گولارچی، ماتلی، ٹنڈوباگو اور تلہار سمیت دیگر شہروں کے اسپتالوں میں بھی ینگ ڈاکٹروں کی ہڑتال جاری ہے۔

ینگ ڈاکٹرز کا کہنا ہے کہ سندھ حکومت نے تنخواہ اور دیگر مراعات پنجاب اور خیبرپختونخوا کے برابر کرنے کی یقین دہانی کروائی تھی، لیکن اس کا نوٹیفیکشن جاری نہیں کیا گیا۔

دوسری جانب خالی اسامیوں پر تقرریوں کے مطالبات پر بھی عمل نہیں کیا گیا۔

احتجاجی ڈاکٹرز کے مطابق انہوں نے حکومتی یقین دہانی پر ہڑتال ختم کرکے مہلت دی لیکن کچھ نہیں ہوا، لہذا تمام او پی ڈیز کے ساتھ ساتھ او ٹیز بھی بند رہیں گے۔

سندھ حکومت نے ینگ ڈاکٹرز کا الاؤنسز میں اضافے کا مطالبہ مان لیا

مختلف گریڈز میں اضافہ 25 ہزار سے 75 ہزار تک کیا گیا ہے: ترجمان محکمہ صحت

واضح رہے کہ گذشتہ ماہ بھی ینگ ڈاکٹرز نے تنخواہوں میں اضافے کے لیے کئی روز تک احتجاج کیا تھا، جس کے بعد 29 جنوری کو سندھ حکومت نے ہڑتال پر بیٹھے ینگ ڈاکٹرز کے مطالبات منظور کرتے ہوئے ان کے الاؤنسز میں اضافہ کردیا تھا۔

ترجمان محکمہ صحت کے مطابق مختلف گریڈز میں اضافہ 25 ہزار سے 75 ہزار تک کیا گیا ہے جس کے تحت گریڈ 17 اور 18کے ڈاکٹرز 60 ہزار تک الاؤنس لے سکیں گے جب کہ گریڈ 19 اور 20 کے ڈاکٹرز 90 ہزار روپے تک الاؤنس لے سکیں گے۔

مطالبات کی منظوری کے بعد صوبائی وزیر صحت ڈاکٹر عذرا پیچوہو نے ڈاکٹروں سے مریضوں کی تکالیف کو مدنظر رکھتے ہوئے ہڑتال ختم کرنے کی اپیل کی تھی، جس پر ینگ ڈاکٹرز نے احتجاج ختم کردیا تھا۔