03 مئی ، 2019 
اقتصادی رابطہ کمیٹی نے پیٹرول کی قیمت میں 9 روپے اضافے کی سفارش کردی
03 مئی ، 2019
اسلام آباد: اقتصادی رابطہ کمیٹی (ای سی سی) نے پیٹرول کی قیمت میں 9 روپے اور ڈیزل کی قیمت میں 5 روپے فی لیٹر اضافے کی سفارش کردی۔
وزیراعظم عمران خان کے مشیر برائے خزانہ عبدالحفیظ شیخ کی زیر صدارت اقتصادی رابطہ کمیٹی کا اجلاس ہوا جس میں پیٹرولیم مصنوعات کی قیمتوں میں اضافے کا معاملہ زیر غور آیا۔
ذرائع کے مطابق ای سی سی نے پیٹرول کی قیمت میں تقریباً 9 روپے جبکہ ڈیزل کی قیمت میں 4 روپے 89 پیسے فی لیٹر اضافے کی سفارش کی ہے۔
ذرائع کے کہنا ہے کہ حکومت پیٹرول کی مد میں 5 ارب روپے کا بوجھ برداشت کرے گی تاہم قیمتوں میں اضافے کی حتمی منظوری وزیر اعظم عمران خان دیں گے۔
وزیراعظم نے منظوری دے دی تو پیٹرول کی نئی قیمت 108 روپے فی لیٹر ہوجائے گی۔
یاد رہے کہ گزشتہ دنوں بھی اوگرا نے مئی کیلئے پیٹرول 14 روپے تک مہنگا کرنے کی سفارش کی تھی تاہم وفاقی کابینہ نے پیٹرولیم مصنوعات کی قیمتوں میں اضافہ مؤخر کرتے ہوئے معاملہ اقتصادی رابطہ کمیٹی کو بھیج دیا تھا۔
