نیوزی لینڈ کو شکست دیکر انگلینڈ پہلی بار کرکٹ کا عالمی چیمپئن بن گیا

لندن: انگلینڈ سنسنی خیز مقابلے کے بعد نیوزی لینڈ کو شکست دیکر پہلی بار کرکٹ کا عالمی چیمپئن بن گیا۔

کیوی ٹیم کے 242 رنز کے ہدف کے تعاقب میں انگلش ٹیم مقررہ 50 اوورز میں 241 رنز بناسکی۔

انگلش ٹیم کو آخری اوور میں 15 رنز درکار تھے تاہم کیوی بولر ٹرینٹ بولٹ نے ابتدائی دو گیندوں پر کوئی رن نہیں بننے دیا۔

جس کے بعد انگلش بلے باز اسٹوکس نے اگلی گیند پر شاندار چکھا لگا کر اپنی ٹیم کو میچ میں واپس لائے، چوتھی گیند پر 2 رنز لیتے ہوئے اوور تھرو کی وجہ سے انگلش ٹیم کو 6 رنز مل گئے اور نیوزی لینڈ شائقین کی امیدیں دم توڑتی دکھائی دیں تاہم پانچویں گیند پر 2 رنز لینے کی کوشش میں عادل رشید رن آؤٹ ہوئے۔

میچ کی آخری گیند پر انگلینڈ کا آخری کھلاڑی دوسرا رن بنانے کی کوشش میں رن آؤٹ ہوگیا اور یوں میچ برابر ہوگیا۔

سپر اوور

سپر اوور میں انگلینڈ کی جانب سے اسٹوکس اور بٹلر کھیلنے آئے جنہوں نے 16 رنز کا ہدف دیا، جواب میں نیوزی لینڈ کو سپر اوور کی آخری گیند پر 2 رنز درکار تھے کہ مارٹن گپٹل 2 رنز لینے کی کوشش میں رن آؤٹ ہوئے اور یوں میچ ایک بار پھر برابر ہوگیا تاہم میچ میں زیادہ باؤنڈریز کی بنیاد پر انگلش ٹیم کو فاتح قرار دیا گیا۔

نیوزی لینڈ کی اننگز

قبل ازیں لارڈز کے تاریخی گراؤنڈ میں نیوزی لینڈ کے کپتان کین ولیمسن نے فائنل میچ کا ٹاس جیت کر پہلے بیٹنگ کا فیصلہ کیا۔

مارٹن گپٹل اور ہنری نکولس نے انگلینڈ کے خلاف اننگز کا آغاز کیا لیکن گپٹل ایک بار پھر ناکام ثابت ہوئے اور 19 رنز بنا کر کرس ووکس کی گیند پر ایل بی ڈبلیو ہوگئے۔

گپٹل کے آؤٹ ہونے کے بعد نکولس اور ولیمسن نے محتاط انداز میں بیٹنگ کرتے ہوئے ٹیم کا اسکور آگے بڑھایا تاہم 103 کے مجموعی اسکور پر ولیمسن  30 رنز بناکر پلنکٹ کی گیند پر کیچ آؤٹ ہوئے۔

اس کے بعد نکولس نے ذمہ درانہ بیٹنگ کرتے ہوئے نصف سنچری بنائی تاہم وہ بھی 118 کے مجموعی اسکور پر پلنکٹ کی گیند پر بولڈ ہوئے، انہوں نے 55 رنز کی اننگز کھیلی۔ روس ٹیلر بھی 14 رنز بنا کر ایل بی ڈبلیو ہو ئے۔

ٹوم لیتھم کی ذمہ دارانہ بیٹنگ کی بدولت کیوی ٹیم نے مقررہ 50 اوورز میں 8 وکٹوں کے نقصان پر 241 رنز بنائے۔ نیوزی لینڈ کی جانب سے نکولس 55 اور لیتھم 47 رنزبناکر نمایاں رہے۔

انگلش ٹیم کے لیام پلنکٹ اور ووکس نے 3، 3 کھلاڑیوں کو آؤٹ کیا۔

انگلش ٹیم کی اننگز

نیوزی لینڈ کے 242 رنز کے ہدف میں انگلش ٹیم کا آغاز مایوس کن تھا اور 28 کے مجموعی اسکور پر جیسن روئے 17 رنز بناکر آؤٹ ہوئے۔

جوئے روٹ 7 رنز بناکر گرینڈ ہوم کا شکار بنے جب کہ بیئراسٹو بھی 36 اور اوئن مورگن 9 رنز بناکر پویلین لوٹے۔ 

اسٹوکس اور بٹلر نے شاندار بیٹنگ کی اور نصف سنچریاں بنائی، دونوں کھلاڑیوں کے درمیان 110 رنز کی شراکت انگلش ٹیم کو میچ میں واپس لے آئی تاہم 196 کے مجموعی اسکور پر بٹلر 59 رنز بناکر آؤٹ ہوئے۔

اس کے بعد ووکس 2 اور پلنکٹ 10 رنز بناکر آؤٹ ہوئے، اس دوران میچ ڈرامائی صورت اختیار کرگیا اور مقررہ 50 اوورز میں پوری انگلش ٹیم 241 رنز بناسکی اور یوں میچ برابر ہوگیا۔ 

بین اسٹوکس نے میچ میں آل راؤنڈر کارکردگی کا مظاہرہ کیا اور 98 گیندوں پر 84 رنز بناکر ناقابل شکست رہے جب کہ بٹلر 59 اور بیئراسٹو 36 رنز بناکر نمایاں رہے۔ 

نیوزی لینڈ کے جیمز نیشم اور فیرگوسن نے 3، 3 کھلاڑیوں کو آؤٹ کیا۔ 

بین اسٹوکس شاندار کارکردگی پر میچ کے بہترین کھلاڑی قرار پائے جب کہ نیوزی لینڈ کے کپتان کین ولیمسن کو پلیئر آف دی ٹورنامنٹ کا ایوارڈ دیا گیا۔

ورلڈکپ کی انعامی رقم

ورلڈ کپ کرکٹ ٹورنامنٹ کی فاتح ٹیم کو 40 لاکھ ڈالرز کی انعامی رقم ملے گی جب کہ فائنل ہارنے والی ٹیم 20 لاکھ ڈالرز کی حقدار ہوگی۔

پاکستان ٹیم کو 3 لاکھ ڈالرز ملیں گے، آئی سی سی نے ورلڈکپ کیلئے ایک کروڑ ڈالرز کی انعامی رقم کا اعلان کیا ہوا ہے۔