07 اگست ، 2019 
پی سی بی کا کوچنگ اسٹاف تبدیل کرنے کا فیصلہ
07 اگست ، 2019
پاکستان کرکٹ بورڈ نے قومی ٹیم کے کوچنگ اسٹاف کو تبدیل کرنے کا فیصلہ کیا ہے۔
پاکستان کرکٹ بورڈ کے چیئرمین احسان مانی نے کرکٹ کمیٹی کی سفارشات تسلیم کرتے ہوئے کوچنگ اسٹاف کے معاہدوں میں توسیع نہ کرنے کا فیصلہ کیا ہے۔
قومی ٹیم کے ہیڈ کوچ مکی آرتھر سمیت دیگر کوچنگ اسٹاف کے معاہدوں کی مدت ورلڈ کپ کے بعد ختم ہو رہی تھی۔
ہیڈ کوچ مکی آرتھر، بیٹنگ کوچ گرانٹ فلاور، بالنگ کوچ اظہر محمود اور ٹرینر گرانٹ لوڈن کے معاہدوں میں توسیع نہ کرنے کا فیصلہ کیا ہے۔
پی سی بی کا کہنا ہے کہ کرکٹ کمیٹی کے اراکین نے متفقہ فیصلہ کیا ہے کہ کوچنگ اسٹاف کے معاہدوں میں توسیع نہ کی جائے، جس کے بعد اب چاروں عہدوں کے لیے پاکستان کرکٹ بورڈ جلد اشتہار دے گا جس کے ذریعے نئی تعیناتیاں ہوں گی۔
پاکستان کرکٹ بورڈ کے چیئرمین احسان مانی کا کہنا ہے کہ کرکٹ کمیٹی نے نئے کوچنگ اسٹاف کے لیے مکمل اتفاق کیا ہے اور کوچز کی کارکردگی کا جائزہ لینے والی کمیٹی تجربہ کار لوگوں پر مشتمل ہے۔
احسان مانی نے تمام کوچز کے مستقبل کے لیے نیک خواہشات کا اظہار کرتے ہوئے کہا کہ پاکستان کرکٹ کی بہتری کے لیے فیصلے کرتے رہیں گے۔
پاکستان ٹیم کے کوچنگ اسٹاف میں شامل فیلڈنگ کوچ گرانٹ بریڈ برن اور فزیو کلائیو ڈیکن کے ابھی معاہدوں کی مدت ختم نہیں ہوئی اس لیے وہ خدمات انجام دیتے رہیں گے جب کہ دیگر اسٹاف کے معاہدے 15 اگست کو ختم ہو رہے ہیں۔
ورلڈ کپ میں پاکستان کرکٹ ٹیم کی اوسط درجے کی کارکردگی کے بعد پی سی بی نے کرکٹ کمیٹی کو ذمہ داری سونپی کہ وہ کارکردگی کا جائزہ لے۔
کرکٹ کمیٹی کا اجلاس 2 اگست کو لاہور میں ہوا جب کہ گزشتہ روز سفارشات کو حتمی شکل دے کر پی سی بی کے چیئرمین احسان مانی کو بھجوائیں گئیں۔
پہلے مرحلے میں کرکٹ کمیٹی کا فوکس کوچنگ اسٹاف کی کارکردگی پر رہا۔
