مودی کے جنرل اسمبلی خطاب کے موقع پر نیویارک میں تاریخی کشمیر ریلی نکالی جائے گی

وزیراعظم عمران خان کے معاون خصوصی برائے سیاسی امور نعیم الحق کا کہنا ہے کہ 26 ستمبر کو بھارتی وزیراعظم نریندر مودی کے اقوام متحدہ کی جنرل اسمبلی سے خطاب کے موقع پر نیویارک میں تاریخی کشمیر ریلی نکالی جائے گی۔

’مودی نے تکبر میں بڑی غلطی کردی جس سے کشمیریوں کو آزادی کا تاریخی موقع مل گیا‘

فوج تیار ہے، بھارت کیلئے آزاد کشمیر میں کوئی ایکشن کرنا مشکل ہوگا، قوم مایوس نہ ہو اگر آج اگر کچھ مسلم ممالک ساتھ نہیں تو آگے وہ ہمارے ساتھ ہوں گے، وزیراعظم کا قوم سے خطاب

سماجی رابطوں کی ویب سائٹ ٹوئٹر پر جاری پیغام میں نعیم الحق نے کہا کہ وزیراعظم عمران خان کا کشمیر کے معاملے پر قوم سے خطاب شاندار تھا۔

انہوں نے کہا کہ 26 ستمبر کو جب بھارتی وزیراعظم نریندر مودی اقوام متحدہ کی جنرل اسمبلی سے خطاب کررہے ہوں گے اس وقت نیویارک میں تاریخی کشمیر ریلی نکالی جائے گی۔

نعیم الحق نے کہا کہ وزیراعظم عمران خان خود بھی 27 ستمبر کو اقوام متحدہ کی جنرل اسمبلی سے خطاب کریں گے۔

خیال رہے کہ وزیراعظم عمران خان نے کشمیر کے معاملے پر قوم سے خطاب میں کہا ہے کہ وہ اقوام متحدہ کی جنرل اسمبلی کے 27 ستمبر کو ہونے والے اجلاس میں پوری طرح کشمیر کا مسئلہ اٹھائیں گے اور وہاں دنیا کی قیادت سے مل کر اس مسئلے پر بات کریں گے۔