پاکستان
Time 08 ستمبر ، 2019

وزیراعظم سے چینی وزیرخارجہ کی ملاقات، مقبوضہ کشمیر میں بھارتی اقدام کی مخالفت کا اعادہ


اسلام آباد: صدر مملکت ڈاکٹر عارف علوی اور وزیراعظم عمران خان سے چینی وزیر خارجہ وانگ ای نے علیحدہ علیحدہ ملاقاتیں کی ہیں۔

اعلامیے کے مطابق وزیراعظم عمران خان سے چینی وزیر خارجہ سے وفد کے ہمراہ ملاقات کی جس میں باہمی دلچسپی کے امور، خطے اور عالمی صورتحال پر تبادلہ خیال کیا گیا۔

اس موقع پر وزیراعظم کا کہنا تھا کہ چین کے ساتھ تعلقات پاکستان کی خارجہ پالیسی کا اہم ترین جزو ہیں۔

دوران ملاقات وزیراعظم نے چینی وفد کومقبوضہ کشمیر کی سنگین صورت حال سے آگاہ گیا۔

وزیراعظم عمران خان سے چینی وفد کی ملاقات — فوٹو: پی آئی ڈی 

اس حوالے سے وزیراعظم کا کہنا تھا کہ مقبوضہ کشمیر میں کرفیو سے انسانی حقوق کی سنگین خلاف ورزیاں ہورہی ہیں، مقبوضہ وادی میں جاری کرفیو اور دیگر پابندیاں فوری اٹھانے کی ضرورت ہے۔

وزیراعظم عمران خان نے چین کے ساتھ خطے کے امن واستحکام کیلئے قریبی تعاون جاری رکھنے کے عزم کا اعادہ کیا۔

اس موقع پر وانگ ای نے چینی صدر اور وزیراعظم کی جانب سے نیک خواہشات کا پیغام دیا اور مقبوضہ کشمیر میں یکطرفہ بھارتی اقدام کی مخالفت جاری رکھنے کے عزم اعادہ کیا۔

انہوں نے کہا کہ مقبوضہ کشمیر کی صورتحال پر گہری نظر رکھے ہوئے ہیں، کشمیر کا تنازع تاریخ کا حل طلب تنازع ہے اور مسئلہ کشمیر اقوام متحدہ کی قراردادوں کے مطابق حل ہونا چاہیے۔ 

 پاکستان اور چین کے مابین گہرے دوستانہ تعلقات ہیں: صدر مملکت

صدر مملکت ڈاکٹر عارف علوی سے چینی وزیرخارجہ کی ملاقات — فوٹو: پی آئی ڈی 

علاوہ ازیں صدرمملکت ڈاکٹر عارف علوی سے چین کے وزیر خارجہ نے وفد کے ہمراہ ملاقات کی جس میں وزیرخارجہ شاہ محمود قریشی بھی موجود تھے۔

اس موقع پر صدر مملکت کا کہنا تھا کہ پاکستان اور چین کے مابین گہرے دوستانہ تعلقات ہیں۔

انہوں نے کہا کہ بھارت کی جانب سے مقبوضہ کشمیر کی خصوصی حیثیت کو بدلنے کے اقدامات غیرقانونی ہیں جو کہ مقبوضہ جموں وکشمیر کے آبادیاتی ڈھانچے کو تبدیل کرنے کی سازش ہیں۔

ان کا کہنا ہے کہ لاک ڈاؤن کی وجہ سے مقبوضہ کشمیر میں صورت حال شدید تشویش ناک ہے، مقبوضہ وادی میں کرفیو کا خاتمہ کیا جائے۔

اس موقع پر چینی وزیرخارجہ نے پرتپاک استقبال پر صدر مملکت کا شکریہ ادا کیا اور انہوں نے کہا کہ چین نے ان تمام یکطرفہ اقدامات کی مخالفت کی ہے جنہوں نے حالات کو مزید پیچیدہ کیا۔

مزید خبریں :