’امریکا اور افغان طالبان کے مذاکرات ختم ہوچکے‘

واشنگٹن: امریکی صدر ڈونلڈ ٹرمپ نے ایک بار پھر کہا ہےکہ افغان طالبان کے ساتھ مذاکرات ختم ہوچکے ہیں۔

وائٹ ہاؤس میں میڈیا نمائندوں سے گفتگو کرتے ہوئے امریکی صدر نے کہا کہ طالبان کے ساتھ امریکا کے امن مذاکرات اب ’مر‘ چکے ہیں، جہاں تک میرا تعلق ہے، مذاکرات ختم ہوچکے ہیں۔

امریکی صدر نے طالبان کے ساتھ امن مذاکرات منسوخ کر دیئے

افغان صدر اور طالبان رہنماؤں کے ساتھ آج کیمپ ڈیوڈ میں ہونے والی ملاقاتیں بھی منسوخ کر دی ہیں: ڈونلڈ ٹرمپ

صدر ٹرمپ نے کہاکہ ان کی انتظامیہ امریکی افواج کے انخلا کے عمل پر غور کررہی ہے۔

امریکی صدر کا کہنا تھا کہ ہم افغانستان سے باہر نکلنا چاہیں گے لیکن درست وقت پر نکلیں گے۔

یاد رہے کہ افغان طالبان اور امریکا کے درمیان امن معاہدہ تقریباً طے پاچکا تھا جسے امریکی صدر کی توثیق درکار تھی تاہم صدر ٹرمپ نے کابل دھماکوں کے بعد افغان طالبان سے معاہدہ ختم کردیا جب کہ ان سے ڈیوڈ کیمپ میں خفیہ ملاقات بھی منسوخ کردی۔

ایرانی صدر سے مل سکتا ہوں: ٹرمپ

دوسری جانب ایران اور امریکا کے درمیان تعلقات سے متعلق سوال پر ٹرمپ نے کہا کہ وہ ایرانی صدر حسن روحانی سے مل سکتے ہیں، انہیں اس حوالے سے کوئی پریشانی نہیں ہے، یہ ہوسکتا ہے۔

امریکی صدر کاکہنا تھا کہ ایران کو اپنی سمت درست کرنا چاہیے کیونکہ اس وقت وہ بہت بری پوزیشن میں ہے۔

صدر ٹرمپ نے ایران میں مہنگائی کا تذکرہ کرتے ہوئے کہا کہ ہم اسے 24 گھنٹوں میں حل کرسکتے ہیں، ہر چیز ممکن ہے، وہ (ایران) اپنے مسائل حل کرنے کے قابل ہوجائیں گے۔

واضح رہے کہ 2015 کی ایٹمی ڈیل سے دستبردار ہونے کے بعد امریکی صدر نے ایران پر پابندیاں عائد کررکھی ہیں۔

ایرانی صدر حسن روحانی نے کہا تھا کہ ایران امریکا کی جانب سے عائد پابندیوں کے ختم کیے جانے تک اس سے بات نہیں کرے گا۔