بابراعظم بھارتی کپتان کوہلی سے آگے نکل گئے

پاکستان کے نوجوان بلے باز بابراعظم نے بھارتی ٹیم کے کپتان ویرات کوہلی کو سنچریوں کے ریکارڈ میں پیچھے چھوڑ دیا۔

کراچی کے نیشنل اسٹیڈیم میں سری لنکا کے خلاف بابر اعظم 105 گیندوں پر 4 چھکوں اور 8 چوکوں کی مدد سے 115 رنز بناکر آؤٹ ہوئے، یہ ان کے کیریئر کی 11 ویں سنچری ہے جو انہوں نے 97 گیندوں پر بنائی۔

سری لنکا کیخلاف دوسرے ون ڈے میں بابراعظم کا ایک اور اعزاز

بابر اعظم 2013 کے بعد کسی کلینڈر ائیر میں ایک ہزار ون ڈے رنز بنانے والے پہلے پاکستانی ہیں

سنچریوں کے ریکارڈ میں بابر اعظم نے بھارتی کپتان کو پیچھے چھوڑ دیا ہے اور انہوں نے اپنے کیریئر کی 11 ویں سنچری 71 ویں اننگز میں بنائی جبکہ ویرات کوہلی نے 82 ویں اننگز میں 11 سنچریاں بنائی تھیں۔

جنوبی افریقا کے ہاشم آملہ نے 64 اور کوئنٹن ڈی کوک نے 65 اننگز میں 11سنچریاں مکمل کی تھیں۔

بابر اعظم نے اپنی 71 ویں اننگز میں ایک اور سنگ میل عبور کیا اور وہ 2013 کے بعد ایک سال میں ہزار ون ڈے رنز بنانے والے پہلے کھلاڑی بن گئے ہیں۔

کامیابی کا راز ہر شعبے میں سو فیصد دینا ہے:بابر

بابر اعظم سے جب اس سال میں ان کی شاندار کارکردگی پر سوال ہوا تو ان کا کہنا تھا کہ کامیابی کا راز یہی ہے کہ وہ ٹریننگ اور نیٹ پریکٹس میں اپنا سو فیصد دیتے ہیں اور جب میچ کیلئے آتے ہیں تو کوشش کرتے ہیں کہ دو سو فیصد دیں۔ 

بابر اعظم نے بتایا کہ اس سال کاؤنٹی کرکٹ کھیل کر ان کی بیٹنگ میں اور بھی نکھار آیا ہے۔ وہ ہر میچ میں یہی سوچ کر میدان میں اترتے ہیں کہ انہیں اپنا بیسٹ دینا ہے۔ 

انہوں نے کہا کہ ہوم گراونڈ پر کھیل کر سب کو اچھا لگتا ہے، خوشی ہوتی ہے جب اپنے کراوڈ کے سامنے کھیلتے ہیں۔

 ایک سوال پر بابر اعظم نے کہا کہ انہیں خوشی ہوگی اگر وہ پاکستان کی جانب سے سب سے زیادہ سنچریوں کا ریکارڈ بنانے میں کامیاب ہوجاتے ہیں لیکن ان کی نظر ریکارڈز پر نہیں، ان کی کوشش ہوتی ہے کہ وہ میچ بائی میچ پرفارمنس پر توجہ دیں۔ 

بابر اعظم کا کہنا تھا کہ ان کا رول یہی ہے کہ وہ آخر تک کھیلیں اور دیگر پلیئرز ان کے اردر گرد پرفارم کریں، لیکن صورتحال کے حساب سے وہ گیم تبدیل کرسکتے ہیں۔ 

ان کا کہنا تھا کہ نائب کپتانی کا کوئی پریشر نہیں، کپتانی کرنا تو ہر کھلاڑی کا خواب ہوتا ہے لیکن یہ چیز ابھی ان کے ذہن میں نہیں، یہ فیصلے پاکستان کرکٹ بورڈ کو کرنا ہیں۔ 

پاکستان سری لنکا میچ کے بارے میں بابر اعظم نے کہا کہ پاکستان نے ابتدا میں اچھی بولنگ کی لیکن بعد میں وکٹ سلو ہوگیا تھا، سری لنکن مڈل آرڈر کو کریڈیٹ جاتا ہے کہ انہوں نے اچھی بیٹنگ کی۔ 

بابر اعظم نے امید ظاہر کی کہ پاکستان بدھ کو آخری ون ڈے میں بھی شاندار کارکردگی کا سلسلہ جاری رکھے گا۔