انسٹاگرام کا نیا ’Shadow Banning‘ فیچر کیا ہے؟

04 اکتوبر ، 2019

سوشل میڈیا پر بد زبانی اور بد کلامی بہت عام ہے اور صارفین اس مسئلے سے بے حد پریشان بھی ہیں لیکن اب اس سے مسئلے سے نمٹنے کے لیے معروف فوٹو شیئرنگ ایپ انسٹاگرام کی جانب سے ایک اچھا قدم اٹھایا گیا ہے۔

معروف سوشل میڈیا ایپ انسٹاگرام نے اپنے صارفین کے لیے ایسا فیچر متعارف کروایا ہے جس کا نام ’Shadow Banning‘ فیچر ہے، اس فیچر میں صارفین نازیبا گفتگو اور کمنٹ کرنے والوں پر پابندی لگا سکیں گے۔

سوشل میڈیا پر نازیبا گفتگو کرنے والوں سے نمٹنے کے لیے انسٹاگرام کا یہ نیا فیچر عالمی سطح پر تمام تر صارفین کے لیے متعارف کروایا گیا ہے جس کے ذریعے صارفین نہ صرف نازیبا اور بد کلامی کرنے والے شخص پر پابندی لگا سکیں گے بلکہ اس فیچر سے اُس شخص کو یہ بھی معلوم نہیں ہوگا کہ آپ نے اس پر پابندی لگائی ہے۔

کمپنی کا کہنا ہے کہ اس فیچر کو ڈیزائن کرنے کا مقصد یہ ہے کہ صارفین نازیبا گفتگو اور کمنٹ کرنے والے کو ’Report‘ یا ’Block‘ کرنے کے بجائے ان پر پابندی لگا سکیں۔

اس فیچر سے صارفین اپنے اکاؤنٹ کو ایسے لوگوں سے بچانے کے ساتھ ساتھ ان پر نظر بھی رکھ سکیں گے کیونکہ ’Shadow Banning‘ فیچر میں آپ پابندی لگائے جانے والے شخص کی پروفائل کو بھی دیکھ سکیں گے۔

اگر آپ کسی بھی ایسے شخص کے کمنٹ سے پریشان ہیں جو کہ نازیبا الفاظ کا استعمال کررہا ہے تو آپ اس پر پابندی لگانے کے لیے کمنٹ کو سوائپ کریں گے اور وہاں ’Restrict‘ یعنی پابندی کا ایک آپشن آئے گا جس پر کلک کرکے آپ پابندی لگا سکتے ہیں۔

ایسا کرنے کے بعد آپ کو اس شخص کی جانب سے کوئی نوٹیفیکیشن موصول نہیں ہوگا اور جس شخص پر آپ پابندی لگائیں گے اس کا کمنٹ آپ کے کسی بھی ’Follower‘ کو نظر نہیں آئے گا جب کہ اگر وہ شخص آپ کی تصویر پر کوئی کمنٹ کرے گا بھی تو آپ کے پاس اس کمنٹ کو ’Approve‘ یا ’Delete‘ کرنے کا آپشن ہوگا۔

علاوہ ازیں اس فیچر میں پابندی لگانے والا شخص اگر صارف کو ’Direct Message‘ کرے گا تو وہ خود بخود ’Request Message‘ کے سیکشن میں چلا جائے گا اور اسے یہ معلوم بھی نہیں ہوگا کہ آپ نے اس کا میسج کب پڑھا۔