اشاروں سے چلنے والا گوگل کا جدید اسمارٹ فون

فوٹو: بشکریہ میش ایبل

معروف ٹیکنالوجی کمپنی گوگل کا ’Motion Sense‘  یعنی اشاروں سے چلنے کی خصوصیت رکھنے والا ’پکسل 4‘ اور ’پکسل 4XL‘ رواں ماہ کے آخر سے آن لائن فروخت کے لیے پیش کیا جائے گا۔

گوگل کمپنی نے گزشتہ روز نیویارک میں نقب کشائی کی تقریب کے دوران ’پکسل 4‘ اور ’پکسل 4XL‘کا اعلان کیا جو کہ 5.7 اور 6.3 انچ کی ڈسپلے کے ساتھ 799 اور 899 ڈالرز میں اس ماہ کے اختتام میں صارفین کو آن لائن فروخت کے لیے پیش کیا جائے گا۔

فون کے او ایل ای ڈی (OLED) ڈسپلے کی خاص بات یہ ہوگی کہ یہ صارفین کو اسکرولنگ اور بہتر طریقے سے گیم کھیلنے کے لیے مددگار ثابت ہوگی، صارفین اس فون کو آج سے ہی آرڈر کرسکتے ہیں جب کہ اس کی شپنگ 24 اکتوبر سے کی جائے گی۔

دونوں اسمارٹ فون اینڈرائید 10 ہوں گے اور اس کے ساتھ ساتھ فون کا خاص کیمرہ جو کہ 16 میگا پکسل اور 12.2 میگا پکسل ہوگا اس کے ’نائٹ موڈ‘ سے صارفین رات میں آسمان پر جگمگاتے ستاروں کو بھی کیمرے کی آنکھ میں محفوظ کر سکیں گے، جو کہ اس سے قبل دیگر موبائل فون کے نائٹ موڈ فیچر سے نہیں ہوسکتے۔

گوگل پکسل فون کے ’نائٹ موڈ‘ سے کھینچی گئی تصویر۔۔۔۔۔ فوٹو: بشکریہ میش ایبل

اس کے علاوہ فون کی کچھ خصوصیات چند ماہ پہلے لیک کر دی گئی تھیں جن کی تصدیق گوگل نے حال ہی میں ہونے والی تقریب میں کی جس میں فون کو ان لاک کرنے کے لیے ’فیس آٗی ڈی‘ کا فیچر شامل تھا۔

’پکسل 4‘ اور ’پکسل 4XL‘ میں ایک ’Motion Sense‘ نامی خصوصیت بھی موجود ہے جس سے فون آپ کے ہاتھوں کے اشارے سمجھ کر کام کرے گا یعنی اس کے لیے آپ کو فون کو چھونے کی ضرورت نہیں ہوگی۔


دونوں پکسل فون کے ماڈل میں 6 جی بی ریم اور اسنیپ ڈریگن 855 پروسیسر ہوگا جب کہ دونوں فون 64 جی بی اور 128 جی بی اسٹوریج کے ساتھ میسر ہوں گے، صارفین اگر زیادہ اسٹوریج والا فون لینے کے خواہشمند ہوں گے تو انہیں اس کے لیے 100 ڈالر اضافی دینے ہوں گے۔

واضح رہے کہ گوگل ’پکسل 4‘ اور ’پکسل 4XL‘ کی نقب کشائی سے قبل ہی متعدد لیکرز اس کے تمام تر فیچرز قبل از وقت ہی صارفین کے سامنے منظر عام پر لے آئے تھے جس کی وجہ سے اس فون کی نقب کشائی کی تقریب نے لوگوں کو زیادہ حیران نہیں کیا کیونکہ وہ اس فون کی زیادہ تر خصوصیات سے واقف تھے۔

مزید خبریں :