دورہ آسٹریلیا تاریخ بدلنے کا بہترین موقع ہے: شان مسعود

پاکستان کرکٹ ٹیم کے سلامی بلے باز شان مسعود کہتے ہیں کہ دورہ آسٹریلیا تمام نوجوان کھلاڑیوں کے پاس اچھا موقع ہے کہ وہ اس دورے میں پرفارم کریں اور خود کو بڑے کھلاڑیوں میں شمار کرائیں۔

کراچی میں پاکستان کرکٹ ٹیم کے اوپن میڈیا سیشن میں جیو نیوز سے گفتگو میں شان مسعود نے کہا کہ آسٹریلیا ٹف حریف ضرور ہے لیکن پاکستانی ٹیم بھی آسٹریلیا میں اپنی تاریخ کو تبدیل کرنے کا ہدف لیے میدان میں اترے گی۔

پندرہ ٹیسٹ میچز میں پاکستان کی نمائندگی کرنے والے بیٹسمین کا کہنا تھا کہ آسٹریلیا ہو یا کوئی اور دورہ، ٹف ضرور ہوتا ہے، آسٹریلیا کو آسٹریلیا میں کھیلنا ہمیشہ چیلنج ہوتا ہے لیکن چیلنج کے ساتھ ساتھ یہ ایک اچھا موقع ہے کہ اس بار وہ کر دکھائیں جو پاکستان ٹیم نے پہلے کبھی نہیں کیا، بہترین رزلٹ دیں گے اور پوری کوشش کریں کہ تاریخ تبدیل کریں۔

واضح رہے کہ پاکستان کرکٹ ٹیم آسٹریلیا میں آج تک ٹیسٹ سیریز نہیں جیت پائی۔

شان مسعود نے کہا کہ نوجوان پلیئرز کے پاس یہ سیریز خود کو منوانے کا اچھا موقع ہے، آج جو ینگسٹر کے طور پر پرفارم کرے گا وہ آئندہ بڑے نام کے طور پر پہنچانا جائے گا۔

ٹیسٹ بیٹسمین نے کہا کہ آج کے جو بھی بڑے نام ہیں، انہوں نے اسٹارٹ ایک ینگسٹر کے طور پر ہی کیا کیوں کہ کوئی بھی پلیئر پہلے سے عظیم کرکٹر بن کر نہیں آتا، وہ پہلے ٹیم میں آتا ہے، پھر پرفارم کرتا ہے اور اس کے بعد وہ بڑا پلیئر بنتا ہے۔

قومی بلے باز نے کہا کہ اب ان سب کے پاس یہ موقع ہے، ویسا ہی جیسا ان تمام گریٹ کے پاس ماضی میں تھا، اب ہمیں اس موقع سے بھرپور فائدہ اٹھاکر ایسی پرفارمنس دینی چاہیے جو پاکستان کے لیے مصباح یا یونس جیسے بڑے ناموں نے دیں، ہم سب کے پاس موقع ہے کہ آسٹریلیا میں پرفارم کریں اور اپنا نام پیدا کریں۔

تیس سالہ بیٹسمین نے کہا کہ وہ ذاتی نمبر نمبرز کی طرف نہیں جاتے، ان کی کوشش ہو گی کہ اپنا 100 فیصد دیں اور گیم میں وہی اپلائی کریں کہ جس کی تیاری کی ہے۔ 

انہوں نے مزید کہا کہ دورہ جنوبی افریقا میں جو غلطیاں ہوئی، اس سے سیکھا ہے اور اب وہ غلطیاں نہیں دہرائیں گے، جو چالیس پچاس کے اسکور وہاں کئے، کوشش کروں گا کہ ان کو تین ہندسو ں کے اسکورز میں تبدیل کروں۔

انہوں نے کہا پس پردہ محنت کو کوئی دیکھتا نہیں، لیکن اس محنت کی اہمت بہت ہے، شان کے مطابق ان کے کھیل میں نکھار کی اہم وجہ ڈومیسٹک کرکٹ ہے کیوں کہ پچھلے چند سالوں میں بہت ڈومیسٹک کرکٹ کھیلی اور پاکستان اے کی جانب سے مختلف سیریز کھیلیں جس سے بہت تجربہ ملا اور اسی تجربے نے جنوبی افریقا میں بہت مدد کی۔

ایک سوال پر شان مسعود نے کہا کہ وہ سیریز میں سرفراز کو مس ضرور کریں گے، ان کا ڈانٹنا، ان کا مذاق کرنا، ان کا آف دی فیلڈ بھائیوں جیسا رویہ، وہ ضرور مس کریں گے تاہم ساتھ ساتھ ان کا یہ بھی کہنا تھا کہ تبدیلی ہوتی رہتی ہے، اب ٹیم کو اظہر علی کی قیادت ملی ہے اور امید ہے کہ اظہر کی کپتانی میں پاکستان ٹیم کامیابیوں کی منزل طے کرے گی۔