15 دسمبر ، 2019 
اسلام آباد: تجاوزات کیخلاف آپریشن میں دل کا دورہ پڑنے سے کھوکھے کا مالک چل بسا
15 دسمبر ، 2019
اسلام آباد: کیپیٹل ڈویلپمنٹ اتھارٹی (سی ڈی اے) کی جانب سے قائداعظم یونیورسٹی کے قریب اراضی پر قائم تجاوزات کے خلاف آپریشن کے دوران ایک کھوکھے کا مالک دل کا دورہ پڑنے سے انتقال کرگیا۔
ضلعی انتظامیہ کے مطابق قائداعظم یونیورسٹی کے قریب اراضی پر قائم تجاوزات کے خلاف آپریشن میں غیرقانونی تعمیرات اور درجنوں کھوکھے گرائے گئے۔
تجاوزات کے خلاف آپریشن میں ضلعی انتظامیہ، سی ڈی اے انفورسمنٹ اور پولیس اہلکار شریک تھے۔
ذرائع کے مطابق آپریشن کے دوران یونیورسٹی طلبہ کی جانب سے مزاحمت کی گئی اور پولیس اہلکاروں پر پتھراؤ کیا گیا۔
پولیس اور مظاہرین میں تصادم کے دوران ایک خاتون گاڑی کی ٹکر سے زخمی ہوگئیں جنہیں اسپتال منتقل کیا گیا جب کہ ایک کھوکھے کا مالک دل کا دورہ پڑنے سے انتقال کر گیا۔
