ترکی میں زلزلے سے ہونے والی ہلاکتوں کی تعداد 35 ہوگئی

ترکی کے مشرقی حصوں میں آنے والے زلزلے سے ہلاکتوں کی تعداد 35 ہوگئی جب کہ ایک ہزار سے زائد افراد زخمی ہیں۔

جمعے کی رات ترکی کا مشرقی حصہ 6.8 شدت کے زلزلے سے لرز اٹھا تھا جس کے باعث درجنوں عمارتیں ملبے کا ڈھیر ہو گئیں۔

رپورٹس کے مطابق زلزلے کے جھٹکے پڑوسی ملکوں شام، جارجیا اور آرمینیا میں بھی محسوس کیے گئے۔ 

ترکی میں زلزلے سے 22 افراد ہلاک، ایک ہزار سے زائد زخمی

ترکی کے مشرقی حصے میں آنے والے زلزلے کے باعث کئی عمارتیں زمیں بوس ہو گئی، سیکڑوں افراد بے گھر اور مواصلات زندگی درہم برہم ہو گیا۔

ڈیزاسٹر اینڈ میجنمنٹ حکام کے مطابق زلزلے کا مرکز الیزگ کا علاقہ تھا جس کی زیرزمین گہرائی 6 اعشاریہ 7 کلومیٹر تھی۔

ترک خبر رساں ادارے کے مطابق مشرقی حصے میں جمعے کے روز آنے والے زلزلے میں اموات کی تعداد 35 ہوچکی ہے۔

حکام کا کہنا ہے کہ عمارتوں کے ملبے تلے دبے 45 افراد کو بچالیا گیا ہے جب کہ متاثرہ علاقوں میں ریسکیو کا کام تاحال جاری ہے۔

دوسری جانب ترک صدر رجب طیب اردوان نے زلزلے کے باعث جاں بحق ہونے والے افراد کے جنازے میں شرکت کی۔

اس موقع پر ترک صدر نے جانی و مالی نقصان پر افسوس کا اظہار کرتے ہوئے متاثرین کو دوبارہ آباد کرنے کا عزم کا اظہار کیا۔

ترک صدر کا کہنا تھا کہ وہ متاثرہ افراد کو تنہا نہیں چھوڑیں گے، ترکی میں بہت سے زلزلے آئے ہیں جن کا ترک قوم نے ہمیشہ صبر کے ساتھ مقابلہ کیا ہے۔