خاتون اول کے بیٹے ابراہیم مانیکا پر پولیس کے ذریعے اغواء کا الزام، نوٹسز جاری
21 فروری ، 2020
لاہور ہائیکورٹ نے خاتون اول بشریٰ بی بی کے بیٹے ابراہیم مانیکا اور پولیس کو شہری کی درخواست پر نوٹس جاری کردیے۔
شہری محمد حسن نے لاہور ہائیکورٹ میں درخواست دائر کی ہے جس میں مؤقف اختیار کیا گیا ہے کہ بشریٰ بی بی اور خاور مانیکا کے بیٹے ابراہیم مانیکا نے میرے بھائیوں کو پولیس کے ذریعے اٹھوا لیا ہے۔
درخواست کے مطابق احمد حسن اور اعجاز احمد کو گاڑی کے تنازعے پر پولیس کے ذریعے اٹھوایا گیا، ابراہیم مانیکا کو 10 لاکھ دے چکے لیکن وہ مزید ڈیڑھ کروڑ روپے کا تقاضہ کررہا ہے اور پولیس بااثر افراد کے خلاف کارروائی نہیں کررہی ہے۔
لاہور ہائیکورٹ کے جسٹس انورالحق پنوں نے محمد حسن کی درخواست پر سماعت کی۔
دوران سماعت پولیس نے جواب جمع کرایا کہ متعلقہ افراد کو کسی بھی کیس میں حراست میں نہیں لیا گیا۔
عدالت نے درخواست پر نوٹس جاری کرتے ہوئے سماعت 24 فروری تک ملتوی کردی۔
