12 مارچ ، 2020 
کورونا کا خوف: سندھ میں میٹرک امتحانات ملتوی، تعلیمی ادارے 30 مئی تک بند
12 مارچ ، 2020
کراچی : سندھ کابینہ نے کورونا وائرس کے پیش نظر گرمیوں کی چھٹیاں یکم مارچ تا 30 مئی تک کرنے کا فیصلہ کیا ہے ساتھ ہی میٹرک کے امتحانات بھی ملتوی کردیے گئے ہیں۔
وزیراعلیٰ سندھ سید مراد علی شاہ کی زیر صدارت سندھ کابینہ کا ہنگامی اجلاس ہوا جس میں اہم فیصلے کیے گئے۔
اجلاس کے بعد اپنے بیان میں وزیر تعلیم سندھ سعید غنی نے کہا کہ سندھ میں تعلیمی ادارے یکم جون سے کھلیں گے جبکہ نویں اور دسویں جماعت کے سالانہ امتحانات ملتوی کردیے گئے ہیں، چھٹیوں کا اطلاق اسکول ، کالجز اور یونیورسٹیوں پر ہوگا۔
سعید غنی نے کہا کہ دو یا تین ہفتوں کیلئے تعلیمی ادارے بند کرتے تو اکیڈمک پلان متاثر ہوتا، کابینہ نے جون جولائی کی گرمیوں کی چھٹیاں قبل ازوقت دینےکافیصلہ کیا، رمضان،عیدکی چھٹیاں بھی ان تعطیلات میں کورہوجائیں گی، وزیراعلیٰ نے ہدایت کی ہے کہ اکیڈمک پلان کا دوبارہ جائزہ لیں، جائزہ لیاجائے گا کہ اضافی 15 دن جو ضائع ہورہے ہیں اسے کیسے کور کریں، جائزہ لیں گے کہ امتحانات، نئے داخلے کی تاریخ کیا ہوگی اور نیا تعلیمی سال کب سےہوگا۔
وزیراعلیٰ سندھ نے ہدایت کی ہے کہ فیصلے سے متعلق تمام اسٹیک ہولڈرز کو اعتماد میں لیا جائے۔
وزیراعلیٰ سندھ کے مشیر قانون مرتضیٰ وہاب نے بھی ٹوئٹ میں کہا ہے کہ تعلیمی ادارے گرمیوں کی تعطیلات کے بعد یکم جون 2020 کو دوبارہ کھلیں گے۔
خیال رہے کہ آج گلگت بلتستان میں کورونا وائرس کا ایک اور مریض سامنے آ گیا ہے جس کے بعد ملک میں متاثرہ مریضوں کی تعداد 21 ہو گئی ہے۔ جن میں سے سندھ میں 15 (14 کراچی ایک حیدرآباد)،گلگت بلتستان میں 3، اسلام آباد میں 2 جب کہ کوئٹہ میں ایک کیس سامنے آیا ہے۔
اس سے قبل وزیراعلیٰ سندھ سید مراد علی شاہ نے پاکستان سپر لیگ (پی ایس ایل) کے پانچویں ایڈیشن کے کراچی میں ہونے والے میچز کے حوالے سے اہم فیصلہ کیا تھا کہ میچز بغیر شائقین کے خالی اسٹیڈیم میں کھیلے جائیں گے۔
ترجمان وزیراعلیٰ سندھ کی جانب سے جاری بیان کے مطابق پی ایس ایل کے حوالے سے فیصلہ کیا گیا ہے کہ کراچی میں آج ہونے والے میچ میں تو شائقین موجود ہیں تاہم کل اور دیگر میچز بند اسٹیڈیم میں ہوں گے۔
