28 مارچ ، 2020 
کراچی: مساجد میں نماز کے اجتماع پر پابندی کی خلاف ورزی کرنے والے کئی پیش امام گرفتار
28 مارچ ، 2020
کراچی میں حکومت کی جانب سے مساجد میں نماز کے اجتماع کی پابندی کی خلاف ورزی کرنے والے پیس اماموں اور مساجد کے ٹرسٹیز کے خلاف مختلف تھانوں میں 30 سے زائد مقدمات درج کرکے گرفتاریوں کا سلسلہ شروع کر دیا گیا۔
شہر بھر میں پولیس نے حکومتی احکامات کی خلاف ورزی کرنے والے مساجد کے پیش اماموں اور ٹرسٹیز کے خلاف 30سے زائد مقدمات درج کرکے گرفتاریوں کا سلسلہ شروع کر دیا ہے۔
یہ مقدمات جن تھانوں میں کئے گئے ہیں ان میں یوسف پلازہ،ثمن آباد،عزیز آباد، شاہراہ نورجہاں،گلبہار، ناظم آباد، رضویہ سوسائٹی، نیوکراچی ،نیوکراچی انڈسٹریل ایریا،سرجانی، سائٹ اے، شیرشاہ، سائٹ بی، پاکستان بازار، مومن آباد کے تھانے شامل ہیں۔ اس کے علاوہ گلشن اقبال کھارادر سمیت دیگر علاقوں کے تھانوں میں بھی خلاف ورزی کرنے والے پیش اماموں کے خلاف مقدمات درج کیے گئے ہیں۔
مقدمات کے اندراج کے بعد گرفتار کیے گئے بعض پیش اماموں کو بیان حلفی لینے کے بعد شخصی ضمانت پہ رہا کردیا گیا ہے جب کہ متعدد گرفتار ہیں۔
جن افراد پہ مقدمات ہوئے ہیں وہاں پر نماز جمعہ سمیت دیگر نمازوں میں پانچ سے زائد افراد کے نماز پڑھنے پر پابندی کے باوجود درجنوں افراد نماز کی ادائیگی کررہے تھے۔
حکومت سندھ کورونا وائرس کی روک تھام کے لیے مساجد میں 5 اپریل تک نماز کے اجتماع پر پابندی عائد کر رکھی ہے۔
