03 اپریل ، 2020 
نجی تعلیمی ادارے والدین سے 80 فیصد فیس وصول کریں: محکمہ اسکولز پنجاب
03 اپریل ، 2020
محکمہ اسکولز پنجاب نے سفارش کی ہے کہ لاک ڈاؤن کے دوران نجی تعلیمی ادارے والدین سے 80 فیصد فیس وصول کریں جب کہ نجی تعلیمی ادارے کسی استاد کو ملازمت سے نہ نکالیں۔
محکمہ اسکولز پنجاب نے وزیر قانون پنجاب کی سربراہی میں قائم کمیٹی کی سفارشات حتمی منظوری کے لیے وزیر اعلیٰ پنجاب کو ارسال کر دی ہیں۔
محکمہ اسکولز پنجاب کی ان تجاویز میں کہا گیا ہے کہ 6 اپریل سے 30 مئی تک کی گرمیوں کی چھٹیاں تصور ہوں گی جب کہ لاک ڈاؤن کی چھٹیوں کے دوران نجی تعلیمی ادارے 20 فیصد فیس معاف کر کے والدین سے اپریل اور مئی کی 80 فیصد فیس وصول کریں۔
تجاویز میں یہ بھی کہا گیا ہے کہ نجی تعلیمی ادارے والدین سے تین ماہ کی اکٹھی فیس نہ لیں بلکہ ماہانہ کی بنیاد پر فیس وصول کی جائے۔
دوسری جانب تجاویز میں مزید کہا گیا ہے کہ کورونا وائرس کی چھٹیوں کے دوران کوئی نجی تعلیمی ادارہ کسی ٹیچرکو ملازمت سے نہ نکالے۔
علاوہ ازیں تجاویز میں یہ بھی کہا گیا ہے کہ محکمہ اسکولز ان چھٹیوں کے دوران ہوم ورک اور لیکچرز مقامی کیبل آپریٹر کے ذریعے طالب علموں تک پہنچانے کا پابند ہو گا، یہ لیکچرز ریاضی اور سائنس مضامین کے ہوں گے۔
تمام سرکاری اسکولوں کے کلاس ایک سے 8 تک کے طالب علموں کو ہوم ورک کی بنیاد پر اگلی کلاسوں میں ترقی دے دی جائے جب کہ نجی تعلیمی ادارے چاہیں تو وہ بھی ایسا کر سکتے ہیں۔
