چینی بحران رپورٹ کے بعد ہٹائے جانے والے شہزاد ارباب وزیراعظم کے معاون خصوصی مقرر

آٹا چینی بحران رپورٹ کے بعد وزیراعظم عمران خان کے مشیر کے عہدے سے ہٹائے جانے والے شہزاد ارباب کو ایک بار پھر وفاقی کابینہ میں وزیراعظم کے معاون خصوصی کی حیثیت سے شامل کرلیاگیا۔

 شہزاد ارباب کو معاون خصوصی اسٹیبلشمنٹ تعینات کیاگیا ہے جس کانوٹیفکیشن بھی جاری کردیاگیا ہے۔ نوٹیفکیشن کے مطابق شہزاد ارباب کا عہدہ وفاقی وزیر کے برابر ہوگا۔

خیال رہے کہ  آٹاچینی بحران کی رپورٹ منظرعام پر آنے کے بعد وزیراعظم نے اپنی کابینہ میں اکھاڑ پچھاڑ کی تھی اس دوران انہوں نے اپنے مشیر  ارباب شہزاد کو بھی عہدے سے ہٹادیا تھا  جب کہ بابر اعوان  کو مشیر برائے پارلیمانی امور  مقرر کیا گیا تھا۔

ذرائع کے مطابق بابر اعوان کو کابینہ میں لانے کے لیے وزیر اعظم کے مشیر اسٹیبلشمنٹ شہزاد ارباب کو قربانی کا بکرا بنایا گیا تھا۔

ذرائع کا کہنا ہے کہ  بابر اعوان معاون خصوصی بننے کو تیار نہیں تھے جب کہ آئین کے رولز آف بزنس کےمطابق وزیراعظم صرف 5 مشیر رکھ سکتے ہیں۔

اب  شہزاد ارباب کی تعیناتی کے بعد وزیراعظم کے معاونین خصوصی کی تعداد 14 ہوگئی ہے جب کہ مشیران 5 ہیں۔