رشی کپور لیجنڈ ہیں اور رہیں گے، نامور پاکستانی شخصیات بھی سپر اسٹار کے انتقال پر غمزدہ

بالی وڈ کے لیجنڈری اداکار رشی کپور کے انتقال پر  مختلف شعبہ ہائے زندگی سے تعلق رکھنے والی نامور شخصیات کی جانب سے افسوس کا اظہار کیا گیا۔

رشی کپور لیوکیمیا (خون کے سرطان)  میں مبتلا تھے اور گزشتہ دو برس سے موت سے جنگ لڑرہے تھے تاہم آج وہ اپنے مداحوں سے بچھڑ گئے جس کی تصدیق ان کے اہل خانہ کی جانب سے کی گئی۔

بھارت کے لیجنڈری اداکار رشی کپور چل بسے

رشی کپور طویل عرصے سے کینسر کے عارضے میں مبتلا تھے۔

لیجنڈری اداکار رشی کپور کے انتقال پر  نامور  پاکستانی شخصیات بھی غمزدہ ہیں اور اپنے دکھ کا اظہار سوشل میڈیا پیغامات کے ذریعےکر رہے ہیں۔

ماورا حسین

اداکارہ ماورا نے سوشل میڈیا پیغام میں لکھا کہ لوگ کبھی نہیں بھولیں گے کہ انہیں آپ سے مل کر کیسا لگتا تھا، میں جب بھی آپ سے ملی مجھے یاد ہے آپ کی رحم دلی، مزاح  آپ کا اردو سے لگاؤ  اور دونوں سرحدوں کے پار کے کھانوں پر طویل بات چیت کرنا، آپ لیجینڈ ہیں اور لیجینڈ ہی رہیں گے۔

ثمینہ پیرزادہ

معروف اداکارہ ثمینہ پیرزادہ نے بھی رشی کپور کو الوداع کہا۔ 

زینب عباس

اسپورٹس اینکر پرسن زینب عباس نے دکھ کا اظہار کرتے ہوئے لکھا کہ گزشتہ روز  عرفان خان اور آج رشی کپور، 2020 میں کیا ہو رہا ہے۔

شعیب اختر

قومی کرکٹ ٹیم کے سابق فاسٹ بولر  شعیب اختر نے گہرے رنج و غم کا اظہار کرتے ہوئے ٹوئٹر پوسٹ پر رشی کپور کی اداکاری کی یادگار تصاویر شیئر کیں اور کہا کہ وہ  اپنے ساتھ ایک عہد لے گئے ہیں۔

راحت فتح علی خان

گلوکار راحت فتح علی خان نے بھی افسوس کا اظہار کرتے ہوئے بتایا کہ’ میرے مرحوم انکل استاد نصرت فتح علی خان اور میرے والد فرخ فتح علی خان کو رشی کپور کی شادی میں پرفارم کرنے کے لیے خصوصی طور پر مدعو کیا گیا تھا‘۔ 

واضح رہے کہ لیجینڈری اداکار رشی کپور کو پاکستان سے بے حد لگاؤ تھا اور وہ اکثر پاکستان کا دورہ کرنے کی خواہش کا اظہار کرتے رہتے تھے۔