10 مئی ، 2020 
ڈپٹی اسپیکر پنجاب اسمبلی اور 3 ملازمین میں کورونا وائرس کی تصدیق
10 مئی ، 2020
ڈپٹی اسپیکر پنجاب اسمبلی دوست محمد مزاری اور اسمبلی کے 3 ملازمین میں کورونا وائرس کی تصدیق ہوگئی۔
گزشتہ ہفتے دوست محمد مزاری دبئی سے لاہور پہنچے تھے جہاں 24 گھنٹے مقامی ہوٹل میں آئسولیٹ ہوئے تھے اور ٹیسٹ رپورٹ منفی آنے پر گھرچلے گئے تھے۔
ڈپٹی اسپیکر پنجاب اسمبلی دوست محمد مزاری کے مطابق نجی لیبارٹری سے کورونا ٹیسٹ کرایا تو منفی آیا ہے لیکن سرکاری لیب سے کورونا ٹیسٹ مثبت آیا ہے۔
انہوں نے کہا کہ میری طبیعت بہتر ہے اور کوئی علامت نہیں ہیں، سیلف آئیسولیشن میں ہوں لیکن چند روز میں دوبارہ ٹیسٹ کراؤں گا۔
دوسری جانب ذرائع پنجاب اسمبلی کے مطابق اسمبلی کے 3 ملازمین میں بھی کورونا وائرس کی تصدیق ہوئی ہے جن میں فوٹو کاپی برانچ کے شمیر ،قانون برانچ کے سلیمان اور ایک ڈی ایس پی شامل ہیں۔
ذرائع کے مطابق دو روز قبل ہونے والے اجلاس میں آنے والے افراد اور سرکاری ملازمین کے ٹیسٹ لیے گئے تھے۔
اُدھر ترجمان پنجاب اسمبلی سیکرٹریٹ کا کہنا ہے کہ ڈپٹی اسپیکر کا تین روز قبل کا ٹیسٹ منفی تھا لیکن اب کا کچھ نہیں کہ سکتے، کس کا ٹیسٹ مثبت ہے یا منفی اس پر رپورٹ فی الحال عام نہیں کریں گے۔
خیال رہے کہ پنجاب میں کورونا وائرس سے اب تک 192 افراد جاں بحق ہوچکے ہیں جبکہ متاثرہ مریضوں کی تعداد 11 ہزار سے زائد ہے۔
