کورونا وائرس کے باعث پاکستان کرکٹ ٹیم کا ایک اور دورہ ملتوی

کورونا وائرس کے باعث پاکستان کی ایک اور سیریز ملتوی ہو گئی، پاکستان کرکٹ ٹیم کا دورہ آئر لینڈ ملتوی کر دیا گیا ہے۔

اس سے قبل پاکستان کا دورہ نیدر لینڈز بھی ملتوی ہو چکا ہے۔ پاکستان نے نیدر لینڈز میں تین ون ڈے جبکہ آئر لینڈ میں دو ٹی ٹوئنٹی میچز کھیلنا تھے جو 12 اور 14 جولائی کو شیڈول تھے۔

پاکستان کا دورہ انگلینڈ کھلاڑیوں کی صحت اور حفاظت سے مشروط

انگلینڈ والے بائیو سیکیور نظام کی بات کر رہے ہیں مگر ہمیں کھلاڑیوں کی آمد ورفت اور رہائش کیلئے فلائٹس اور ہوٹلز کے انتظامات کو بھی دیکھا ہے: چیف ایگزیکٹو پی سی بی

پاکستان کرکٹ بورڈ (پی سی بی) اور کرکٹ آئرلینڈ کی جانب سے یہ مشترکہ فیصلہ آئرش حکومت کے 10 اگست سے قبل بند دروازوں کے پیچھے بھی میچوں کا انعقاد ممکن نہ ہونے کے اعلان کے بعد کیا گیا۔ ان دنوں پاکستان کرکٹ ٹیم 3 ٹیسٹ اور 3 ٹی ٹوئنٹی میچز پر مشتمل سیریز کھیلنے کیلئے ممکنہ طور پر انگلینڈ میں موجود ہو گی۔

پاکستان کرکٹ بورڈ کے چیف ایگزیکٹو وسیم خان نے کورونا وائرس کی وبا کے پیش نظر دورہ آئرلینڈ کے التواء پر دکھ کا اظہار کیا۔

انہوں نے کہا کہ وہ ان مشکل حالات میں کرکٹ آئرلینڈ کے فیصلے کا مکمل احترام کرتے ہوئے اس کی توثیق کرتے ہیں، ہم سب تسلیم کرتے ہیں کہ کھلاڑیوں، آفیشلز اور مداحوں کی صحت اور حفاظت سے بڑھ کر کچھ بھی نہیں ہے۔

پاکستان اور انگلینڈ کے درمیان ٹیسٹ سیریز کے میچز کی تعداد میں اضافے کا امکان

3 کی بجائے 4 ٹیسٹ میچز کی ہونے کی صورت میں سیریز کا آغاز 24 جولائی سے برمنگھم سے ہوگا: ذرائع

انہوں نے کہا کہ ان حالات میں تمام ممالک کیلئے اپنی ہوم سیریز کا انعقاد کرنا مشکل ہے اور اس دوران ہم سب کو بطور کرکٹ فیملی مل کر کام کرنا ہوگا۔

کرکٹ آئرلینڈ کے چیف ایگزیکٹو ویرن ڈاٹرم کا کہنا ہے کہ یکم مئی کو آئرش حکومت کے مرحلہ وار لاک ڈاؤن اٹھانےکے فیصلے کے بعد ان تاریخوں میں پاکستان کرکٹ ٹیم کی میزبانی کرنا ممکن نہیں رہا۔

انہوں نے کہا کہ ہم نے مختلف آپشنر پر غور کیا تاہم حکومتی قواعد وضوابط، بائیو سیکیورٹی، کورنٹائن سمیت کئی دیگر معاملات کے سبب ہمارے لیےان میچوں کا انعقاد کرنا ممکن نہیں ہے۔

چیف ایگزیکٹو کرکٹ آئرلینڈ نے کہا کہ ٹی ٹوئنٹی کرکٹ کی ایک بہترین ٹیم کی میزبانی نہ کرپانے پر انہیں بہت افسوس ہے تاہم پاکستان اور آئرلینڈ کرکٹ بورڈ کے درمیان مضبوط تعلقات قائم ہیں۔

انہوں نے کہا کہ ایسے وقت کا انتظار رہے گا جب ہم ایک بار پھر کرکٹ کے میدان میں ایک دوسرے کے مدمقابل آسکیں۔