20 مئی ، 2020 
سٹیزن پورٹل سے شہری غیر مطمئن، وزیراعظم کا اداروں کیخلاف تحقیقات کا حکم
20 مئی ، 2020
وزیراعظم عمران خان نے پاکستان سٹیزن پورٹل پر شہریوں کی شکایات سے متعلق کوتاہی برتنے پر اداروں کے خلاف تحقیقات کا حکم دے دیا۔
ذرائع وزیراعظم آفس کے مطابق وزیراعظم آفس میں قائم ’شکایات سیل‘ پر شہریوں نے شکایات کے حل پر عدم اطمینان کا اظہار کیا جس پر وزیراعظم عمران خان نے اداروں کے خلاف تحقیقات کا حکم دیا ہے۔
ذرائع کا بتانا ہے کہ وزیراعظم کی ہدایت پر ایک لاکھ 6 ہزار شکایات کو دوبارہ کھولنے کا فیصلہ کیا گیا ہے۔
ذرائع کا کہنا ہے کہ یکم جنوری سے 30 اپریل تک حل کی جانے والی شکایات کو مرحلہ وار کھولا جائے گا اور ان کا میرٹ پر حل یقینی بنایا جائے گا۔
ذرائع کے مطابق وفاق سے 12340، پنجاب سے 17661، بلوچستان سے 482، سندھ سے 3256 اور خیبر پختونخوا سے 5346 شکایات دوبارہ کھولی جائیں گی۔
ذرائع کے مطابق شہری اداروں کی جانب سے شکایات کے حل پر مطمئن نہیں تھے پھر بھی شہریوں کی شکایات کے حل سے متعلق اداروں نے غلط بیانی کی۔
