دلچسپ و عجیب

بھارتی شہری نے 'گوگل میپ' کو ازدواجی زندگی کی بربادی کا ذمہ دار قرار دیدیا

27 مئی ، 2020

بھارت میں ایک شخص نے ازدواجی زندگی میں خرابیوں کا ذمہ دار گوگل میپ کو ہی ٹھہرا دیا اور یہی نہیں بلکہ انہوں نے پولیس کو گوگل میپ کے خلاف شکایت بھی درج کروا دی ہے۔

بھارتی میڈیا کے مطابق 49 سالہ آر چندراسکھار نامی شخص کا کہنا ہے کہ راستے بتانے والی مقبول ترین ایپ گوگل نے ان کی ازدواجی زندگی کو برباد کر کے رکھ دیا ہے۔

انھوں نے بتایا کہ گوگل میپ میں موجود 'یئور ٹائم لائن' فیچر کی وجہ سے ان کی بیوی ان سے ہر وقت سوالات کرتی تھیں کہ وہ ان ان جگہوں پر کیوں گئے۔

49 سالہ بھارتی شخص نے یہ دعویٰ کیا کہ گوگل میپ ان ان جگہوں کی نشاندہی کرتا تھا جہاں وہ کہیں گئے ہی نہیں اور یہی وجہ تھی کہ ان کی بیوی اور ان کے درمیان تنازع کھرا ہوگیا۔

انہوں نے بتایا کہ بچھلے کئی ماہ سے میری بیوی گوگل میپ کے 'یئور ٹائم لائن' فیچر کو مستقل چیک کرتی ہے اور مجھے سونے نہیں دیتی اور سوالات کرتی ہے کہ میں کہاں گیا تھا اور اس کی وجہ سے ہماری ازدواجی زندگی میں خرابیاں شروع ہو گئی ہیں۔

اس تمام تر صورتحال سے پریشان آنے کے بعد آر چندراسکھار مقامی پولیس اسٹیشن پہنچے جہاں انھوں نے پولیس سے گوگل کے خلاف شکایت درج کرنے کو کہا کیوں کہ اس کی وجہ سے ان کی ازدواجی زندگی برباد ہو رہی تھی۔

اس ضمن میں پولیس آفسران نے کہا کہ ہم دونوں میاں بیوی کو کاؤنسلنگ کے لیے بلائیں گے، اگر اس سے بھی معاملہ حل نہیں ہوا تو ہم دوسری حکمت عملی اختیار کریں گے۔