پی ٹی آئی کے رکن ریاض مزاری قومی اسمبلی میں اپنی ہی حکومت پر برس پڑے

پاکستان تحریک انصاف (پی ٹی آئی) کے رکن قومی اسمبلی  ریاض مزاری ایوان میں اظہار خیال کرتے ہوئے اپنی ہی حکومت پر برس پڑے۔

قومی اسمبلی میں اظہار خیال کرتے ہوئے ریاض مزاری کا کہنا تھا کہ نوجوانوں کو حکومت سے بڑی امیدیں تھیں لیکن وہ مایوس دکھائی دیتےہیں، تحریک انصاف کا مشن کرپشن ختم کرنا ہے لیکن یہاں تو نوکریاں فروخت ہو رہی ہیں۔

ریاض مزاری کا کہنا تھا کہ ہم نے الیکشن کے موقع پر جنوبی پنجاب صوبے کی مہم چلائی،گیس پورے ملک میں پہنچ گئی لیکن جنوبی پنجاب قدرتی گیس سے محروم ہے، لائن لاسز کے نام پر لوڈ شیڈنگ نے برا حال کردیاہے ،متحدہ عرب امارات کی حکومت نے ہمیں اسپتال بنا کردیا ہے۔

ان کا کہنا تھا کہ ہمارے علاقے میں امن وامان کی صورت حال سنگین ہوچکی ہے، وزیراعلیٰ پنجاب عثمان بزدار کو امن وامان کی صورت حال سے آگاہ کیا لیکن کوئی شنوائی نہیں،پنجاب کے 5 آئی جی تبدیل ہوگئے لیکن امن نہیں آیا۔

تحریک انصاف کے رکن قومی اسمبلی کا کہنا تھا کہ ہمارے لوگوں کو نوکریاں بھی نہیں مل رہیں،تحریک انصاف کا مشن کرپشن ختم کرنا ہےلیکن یہاں تو نوکریاں فروخت ہو رہی ہیں،جن پر نوکریاں بیچنے کا الزام تھا انہیں ہی تحقیقات سونپ دی گئیں۔

انہوں نے کہا کہ نوکریاں فروخت ہونے کے معاملے کی تحقیقات کرانی چاہیے،قائمہ کمیٹی نوکریاں بیچنے کے معاملے کی تحقیقات کرے۔