بشریٰ انصاری نے معافی مانگ لی

پاکستان انٹرٹینمنٹ انڈسٹری کی مقبول اداکارہ بشریٰ انصاری نے  ایک تبصرے میں نازیبا الفاظ استعمال کرنے پر اپنے مداحوں سے معافی مانگ لی۔

گزشتہ دنوں سوشل میڈیا پر اماں نام سے مقبول  لبنیٰ فریاد نے ایک وی لاگ میں اداکارہ بشریٰ انصاری کے ڈرامے ’زیبائش‘ میں اداکاروں کی اداکاری کا تمسخر اڑایا تھا جس پر بشریٰ انصاری سیخ پا ہوگئی تھیں۔

تنقید پر بشریٰ انصاری آپے سے باہر، نازیبا الفاظ لکھ کر کمنٹ ڈیلیٹ کردیا

بشریٰ انصاری کے کمنٹس پر سوشل میڈیا صارفین نے انہی کو آڑے ہاتھوں لے لیا

بشریٰ انصاری کے لبنیٰ فریاد کی تنقید کے جواب میں سخت الفاظ استعمال کرنے پر متعدد صارفین نے ان پر ہی تنقید کی بوچھار کر ڈالی تھی۔

بعدازاں  بشریٰ انصاری نے اپنا کمنٹ ڈیلیٹ کردیا تھا لیکن تب تک ان کے کمنٹ کے اسکرین شاٹ سوشل میڈیا پر وائرل ہوچکے تھے۔

اس تمام تر صورتحال کے بعد لبنیٰ فریاد کی بھی ایک ویڈیو سامنے آئی تھی جس میں انہوں نے بشریٰ انصاری کے کمنٹ کا تفصیل سے جواب دیا تھا۔

لیکن اب اداکارہ بشریٰ انصاری نے اس تمام تر تنازع کے بعد اپنے مداحوں کے لیے ایک طویل پیغام جاری کیا اور ساتھ ہی اپنے الفاظ پر معافی بھی مانگی۔

بشریٰ انصاری نے اپنے پیغام میں لکھا کہ 'فنکار، مصنف، ہدایتکار، اور پروڈیوسرز تخلیقی صلاحیتوں کے حامل ہوتے ہیں اور وہ اپنا کام بے حد دل سے کرتے ہیں، ان کا پروجیکٹ ان کے بچے کی طرح ہوتا ہے اور وہ اسے محبت کے ساتھ لوگوں کے لیے بناتے ہیں'۔

انہوں نے کہا کہ 'جب کوئی آپ کی محنت کا مذاق اڑاتا ہے تو تکلیف ہوتی ہے، ہر ایک کو ہمارے کام کو پسند یا نا پسند کرنے کا حق ہے لیکن زبان کی اہمیت ہے'۔

بشریٰ انصاری نے مزید کہا کہ 'مجھے احساس ہے کہ میں نے انسٹاگرام پر سخت الفاظ لکھے تھے، ایک لمحے میں مجھے اپنی غلطی کا احساس ہوا اور میں نے اس کمنٹ کو ڈیلیٹ کردیا لیکن سوشل میڈیا کے اس دور میں یہ ایک تماشہ بن گیا اور افسوس کے ساتھ یہ آگ کی طرح پھیل گیا'۔