ٹی ٹوئنٹی ورلڈکپ ملتوی ہونے کے بعد پی سی بی کا متبادل پلانز پر غور

ایشیا کپ اور ٹی ٹوئنٹی ورلڈ کپ ملتوی ہونے کے بعد پاکستان کرکٹ بورڈ (پی سی بی) نے متبادل پلانز اور  فیوچر ٹور پروگرامز (ایف ٹی پی) کی سیریز کے بارے میں غور شروع کردیا۔

ایشیا کپ اور ٹی ٹوئنٹی ورلڈ کپ کے ملتوی ہونے کے بعد پی سی بی نے ونڈوز خالی ہونے پر کئی ممالک سے رابطے کیے ہیں۔

شائقین کرکٹ کو دھچکا، کورونا کے باعث ٹی ٹوئنٹی ورلڈ کپ بھی ملتوی

بھارت میں ہونے والے 2023 ورلڈ کپ (50 اوورز) کی تاریخ کو بھی چھ ماہ آگے بڑھا دیا گیا ہے، اب 2023 کا ورلڈ کپ فروری مارچ کی بجائے اکتوبر اور نومبر میں کھیلا جائے گا

پاکستان کرکٹ ٹیم نے ایشیا کپ کے بعد ایف ٹی پی کے تحت مختصر دورانیے کی سیریز کے لیے جنوبی افریقا کا دورہ بھی کرنا ہے جہاں 3 ون ڈے اور 3 ٹی ٹوئنٹی میچز شیڈول ہیں۔

پاکستان کرکٹ بورڈ کے چیف ایگزیکٹو وسیم خان کا کہنا ہے کہ پس منظر میں کئی ممالک کے ساتھ بات چیت جاری ہے، یہ ابھی فیصلے کا وقت نہیں ہے لیکن پلاننگ جاری رکھیں گے۔

انہوں نے کہا کہ ہماری طرح دوسرے ممالک بھی پاکستان آنے سے قبل یہاں کے حالات کا جائزہ لیں گے، عالمی وبا کی لہر جاری ہے اور کسی کے لیے اس وقت فیصلہ کرنا مشکل ہے۔

ان کا کہنا ہے کہ اس لیے جنوبی افریقا مختصر دورانیے کی سیریز کھیلنے کے لیے جانے کا کوئی فیصلہ نہیں کیا لیکن جنوبی افریقی بورڈ کے ساتھ کئی معاملات پر بات ہو رہی، وہاں بھی حالات بہتر نہیں ہیں۔

وسیم خان نے کہا کہ موجودہ صورتحال کے مطابق اس وقت ہم یہ نہیں کہہ سکتے کہ وہاں جائیں گے یا نہیں اگلے تین چار ہفتے اہم ہیں، اس دوران فیصلہ کرنے کی پوزیشن میں آجائیں گے۔

خیال رہے کہ کورونا وائرس کی وجہ سے رواں برس آسٹریلیا میں شیڈول ٹی ٹوئنٹی ورلڈ کپ ملتوی کردیا گیا ہے اور اب یہ ایونٹ اگلے برس ہوگا۔