اپوزیشن چیئرمین نیب کی مدت ملازمت میں توسیع کی حمایت نہیں کریگی: ایاز صادق

مسلم لیگ ن کے مرکزی رہنما اور سابق اسپیکر قومی اسمبلی سردار ایاز صادق کا کہنا ہے کہ متحدہ اپوزیشن چیئرمین نیب کی مدت ملازمت میں توسیع کی حمایت نہیں کرے گی۔ 

جیو نیوز کے پروگرام ’’نیا پاکستان‘‘ میں گفتگو کرتے ہوئے ایاز صادق نے کہا کہ متحدہ اپوزیشن کو ڈپٹی چیئرمین اور  پراسیکیوٹر جنرل نیب کی مدت میں توسیع کی تجویز بھی قبول نہیں ہے۔

حکومت نیب قانون تبدیل کرنے کیلئے تیار ہے، شاہ محمود قریشی

حکومت نے محسوس کیا کہ 12 کروڑ کے پنجاب کو ایک جگہ سے بیٹھ کر نہیں چلایا جا سکتا، ہم سے چھوٹا بھارتی پنجاب کئی ریاستوں میں تقسیم ہو چکا ہے، وزیرخارجہ

انہوں نے کہا کہ نیب قانون میں مجوزہ ترمیم کے مسودے میں چیئرمین نیب، ڈپٹی چیئرمین نیب اور پراسیکیوٹر جنرل نیب کی مدت ملازمت میں توسیع کی شق شامل ہے۔ 

مسلم لیگ (ن) کے رہنما نے کہا کہ مسودہ حکومتی کمیٹی نے غور کے لیے اپوزیشن کے حوالے کیا تھا، نیب قانون میں تبدیلی کے لیے حکومت اور اپوزیشن کا اجلاس آج شام کو ہو گا۔

یاد رہے کہ دو روز قبل وزیر خارجہ شاہ محمود قریشی نے بھی اپنے بیان میں کہا تھا کہ حکومت نیب قوانین میں تبدیلی کے لیے تیار ہے۔