لڑکی کو بے لباس کرنے کا کیس: ملزمان ضمانت خارج ہونے پر گرفتار

راولپنڈی میں لڑکی کو بے لباس کرکے ویڈیو بنانے کے کیس میں 2  ملزمان کو عدم پیروی پر ضمانت خارج ہونے پر گرفتار کرلیا گیا۔

راولپنڈی کی مقامی عدالت میں تھانہ وارث خان کی حدود میں لڑکی کو بے لباس کرنے کے معاملے کی سماعت ہوئی۔

ملزمان کی عدم پیروی پرعدالت نے ضمانت خارج کردی اور ملزمان کو گرفتار کرنے کا حکم دیا۔

پولیس ترجمان کے مطابق ملزمان ضمانت خارج ہونے پر احاطہ عدالت سے فرار ہوگئے تھے تاہم پولیس نے کارروائی کر کے دونوں ملزمان کو گرفتار کرلیا۔

انہوں نے کہا کہ واقعے میں ملوث تینوں ملزمان کو پولیس گرفتار کرچکی ہے جب کہ دونوں ملزمان کو عدالت میں پیش کر کے جسمانی ریمانڈ حاصل کیا جائے گا۔

تھانہ وارث خان پولیس نے ملزمان کے خلاف ایف آئی آر میں 354 اے کی دفعہ کا اضافہ بھی کردیا ہے۔

خیال رہے کہ ملزم ارسلان اور محسن نے  7 اگست کو عدالت سے رجوع کرکے 11 اگست تک ضمانت قبل ازگرفتاری حاصل کی تھی۔

واضح رہے کہ چند ماہ قبل راولپنڈی کے علاقہ سید پوری گیٹ میں رات کے آخری پہر مبینہ طورپر نشے میں دھت 4 نوجوانوں نے راہ چلتی لڑکی کے کپڑے پھاڑ ڈالے اور اس کی ویڈیو بنا کر سوشل میڈیا پر ڈال دی تھی۔

ویڈیو سوشل میڈیا پر وائرل ہونے کے بعد سی پی او راولپنڈی کے حکم پر ملزمان محسن اور ارسلان عرف آنی کے خلاف 15 جولائی کو مقدمہ درج کر لیا گیا تھا لیکن کوئی گرفتاری عمل میں نہیں آئی تھی۔