موبائل چور بندر بھی سیلفی بخار میں مبتلا

یوں تو سیلفی کے بخار نے پوری دنیا کے انسانوں کو لپیٹ میں لے رکھا ہے تاہم اب جانور بھی اس سے متاثر نظر آتے ہیں اور اس کی تازہ ترین مثال ملائیشیا میں سامنے آئی ہے جہاں ایک بند کی موبائل سے لی گئی سیلفیاں سوشل میڈیاپر خوب وائرل ہورہی ہیں۔

ملائیشیا میں ایک طالب علم زیکریڈز روڈزی کاکہنا ہے کہ اس کا موبائل فون اس وقت چوری ہوگیا تھا جب وہ اپنے گھر میں سورہا تھا، اور اسے بالکل اندازہ نہیں تھا کہ اس کا موبائل کون لے کر جاسکتا ہے۔

زیکریڈز روڈزی کے مطابق اس نے بہت ڈھونڈا لیکن موبائل نہیں ملا، اگلے روز اس کے والد نے دیکھا کے ایک بندر ان کے گھر کے پاس بیٹھا ہوا ہے جب کہ اسی موقع پر اس نے اپنے فون پر کال کی تو اس کی آواز گھر کے عقب میں واقع جنگل سے آتی سنائی دی اور وہاں جاکر دیکھا تو اسے کجھور کے درختوں کے بیچ مٹی سے لدا اس کا موبائل مل گیا۔

اس کے انکل نے ازراہ مذاق کہا کہ موبائل کھولو شاید اس میں چور کی تصویر ہو اور جب اس نے موبائل کھولا تو اس میں ایک بندر کی لا تعداد تصویریں اور ایک ویڈیو موجود تھیں۔

زیکریڈز روڈزی نے یہ تصاویر اور ویڈیو سوشل میڈیا پر پوسٹ کردیں جو کہ وائرل ہوگئی ہیں اور دنیا بھر میں اسے پسند کیا جارہا ہے۔

فون غائب ہونے کے چند گھنٹوں کے بعد بنائی گئی ویڈیو میں ایک بندر کو دیکھا جا سکتا ہے جو کہ بظاہر فون کھانے کی ناکام کوشش کر رہا ہے، اس کے علاوہ فون میں بندر، درختوں اور پودوں کی بہت سی دوسری تصاویر بھی موجود ہیں۔

موبائل جنگل تک کیسے پہنچا اس بات کی تصدیق تو نہیں ہوسکی ہے تاہم زیکریڈز روڈزی کا کہنا ہے کہ یہ بندر کی ہی کارستانی لگتی ہے۔