Can't connect right now! retry

انٹرٹینمنٹ
29 ستمبر ، 2020

ایک اور بھارتی اداکار کی خودکشی، گھر والوں نے قتل کا شبہ ظاہر کردیا

26 سالہ بھارتی اداکار اکشانت اتکرش کی گلوکار میکا سنگھ کے ساتھ یادگار تصویر — فوٹو: فائل 

26 سالہ بھارتی اداکار اکشانت اتکرش نے ممبئی میں اپنے گھر میں پنکھے سے لٹک کر خودکشی کرلی۔

پولیس کے مطابق اکشانت اتکرش کا تعلق بھارتی ریاست بہار سے تھا اور وہ بھارتی شہر ممبئی کے علاقے اندھیری میں اپنی دوست کے ساتھ اپارٹمنٹ میں رہائش پذیر تھے جہاں انہوں نے رات کو پنکھے سے لٹک کر خود کشی کی۔

حکام نے بتایا کہ ساتھی خاتون نے بیان میں کہا ہے کہ نوجوان اداکار کسی قسم کی پریشانی میں مبتلا نہیں تھے اور معمول کے مطابق اتوار کی رات بالکل ٹھیک تھے، ایک ساتھ کھانا کھایا جس کے بعد سونے کے لیے اپنے روم میں چلے گئے تاہم رات 11:30 پر واش روم جانے کے لیے اٹھی تو اکشانت کو مردہ پایا۔

پولیس نے لاش پوسٹمارٹم کے بعد لواحقین کے حوالے کردی اور حادثاتی موت کا پرچہ درج کر کے تحقیقات شروع کردی ہیں جب کہ ابتدائی تحقیقات اور پوسٹمارٹم رپورٹ میں کسی جرم کے ثبوت نہیں ملے ہیں۔

پولیس کا کہنا ہے کہ اداکار انڈسٹری میں کام نہ ملنے پر پریشان تھے جس پر انہوں نے اتوار کی رات یہ انتہائی قدم اٹھایا۔

دوسری جانب اداکار کے گھر والوں نے خودکشی کے بجائے قتل کا الزام عائد کیا ہے اور شکایت کی ہے کہ ممبئی پولیس معاملے کو سنجیدہ نہیں لے رہی اور قتل کا مقدمہ نہیں درج کررہی۔

اداکار کے چچا کا کہنا ہے کہ اکشانت کسی ڈپریشن میں نہیں تھا، وہ کام تلاش کررہا تھا اور اسے ایک فلم بھی ملی تھی۔ 

خیال رہے کہ بہار سے ہی تعلق رکھنے والے اداکار سشانت سنگھ راجپوت نے رواں سال جون میں خودکشی کرلی تھی۔ 

ان کی خودکشی کے بعد بھارتی فلم انڈسٹری میں اقربا پروری اور منشیات کے استعمال پر نئی بحث شروع ہوگئی ہے اور یہ معاملہ سپریم کورٹ تک پہنچ گیا ہے۔ 

بھارتی تحقیقاتی اداروں نے اب تک سشانت کیس میں ان کی گرل فرینڈ ریا چکرورتی سمیت 12 افراد کو گرفتار کیا ہے جب کہ منشیات کا معاملہ سامنے آنے کے بعد صف اول کی اداکاراؤں دپیکا، شردھا کو بھی شامل تفتیش کیا ہے۔

مزید خبریں :

Notification Management


پاکستان
دنیا
کاروبار
کھیل
انٹرٹینمنٹ
صحت و سائنس
دلچسپ و عجیب

ڈیسک ٹاپ نوٹیفکیشن کے لیے سبسکرائب کریں
Powered by IMM