پاکستان: کورونا سے 4 ماہ کے دوران ایک روز میں سب سے زیادہ 42 ہلاکتیں

ملک میں کورونا سے گزشتہ 24 گھنٹوں میں 4 ماہ کے دوران ایک روز میں سب سے زیادہ ہلاکتیں اور کیسز رپورٹ ہوئے ہیں۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 42752 ٹیسٹ کیے گئے جن میں 2843 افراد میں کورونا وائرس کی تصدیق ہوئی جب کہ وائرس سے مزید 42 افراد انتقال کرگئے۔

این سی او سی کے مطابق ملک میں گزشتہ 24 گھنٹوں کے دوران کیے گئے ٹیسٹوں میں کورونا مثبت آنے کی شرح 6.6فیصد رہی۔

ملک میں گزشتہ 24 گھنٹوں میں ہونے والی ہلاکتیں 4 ماہ میں ایک روز کے دوران سب سے زیادہ ہلاکتیں ہیں جب کہ رپورٹ ہونے والے کیسز بھی 4 ماہ کے دوران ایک روز میں سب سے زیادہ ہیں۔

اس سے قبل 9 جولائی کو ملک میں کورونا کے 3360 کیسز سامنے آئے تھے اور 17 جولائی جو 49 ہلاکتیں ہوئی تھیں۔

سرکاری پورٹل کے مطابق پاکستان میں کورونا کیسز سے ہلاکتوں کی تعداد 7603 ہوگئی ہے جب مجموعی کیسز 3 لاکھ 71508 تک جا پہنچے ہیں۔

اس کےعلاوہ 24 گھنٹوں کے دوران ملک بھر میں 1389 مریض کورونا سے صحتیاب بھی ہوئے ہیں۔

صوبوں کی صورتحال

سرکاری پورٹل کے مطابق سندھ میں کورونا کے مریضوں کی مجموعی تعداد 161028 ہوگئی ہے جب کہ 2799 افراد اب تک انتقال کرچکے ہیں۔

پنجاب میں کورونا کے کل مریضوں کی تعداد 113457 ہے اور 2826 افراد وائرس میں مبتلا ہوکر جان سے جاچکے ہیں جب کہ بلوچستان میں مریضوں کی کل تعداد 16699 اور ہلاکتیں 158 ہوچکی ہیں۔

خیبرپختونخوا میں کورونا کے مریضوں کی تعداد 43730 اور 1323 ہلاکتیں ہوچکی ہیں جب کہ آزاد کشمیر میں 5911 افراد وائرس میں مبتلا ہوچکے ہیں اور 134 افراد انتقال کرگئے۔

اس کے علاوہ گلگت بلتستان میں اب تک کورونا کے مریضوں کی تعداد 4506 اور 93 افراد انتقال کرچکے ہیں۔

پورٹل کے مطابق وفاقی دارالحکومت اسلام آباد میں کورونا کے مریضوں کی مجموعی تعداد 26177 ہے اور اب تک 270 مریض انتقال کرچکے ہیں۔