پیٹرول کی قلت پر بنائے گئے کمیشن کی تحقیقات مکمل، رپورٹ وزیراعظم کو موصول
14 دسمبر ، 2020
شوگر انکوائری کمیشن کے بعد پیٹرول کی قلت پر بنائے گئے پیٹرولیم کمیشن کی تحقیقات بھی مکمل ہوگئی۔
وزیر اعظم کے عمران خان کے مشیر برائے احتساب و داخلہ بیرسٹر شہزاد اکبر کا کہنا ہے کہ وفاق کے حکم پر قائم پیٹرولیم کمیشن کی رپورٹ وزیراعظم کو موصول ہوگئی اور وزیراعظم کے حکم کے مطابق رپورٹ کل کابینہ میں پیش کی جائے گی۔
انہوں نے کہا کہ وزیراعظم کی ہدایت کے مطابق کابینہ کی منظوری کے بعد رپورٹ عام کی جائے گی۔
ان کا کہنا تھا کہ احتساب اور شفافیت صرف تحریک انصاف کا خاصہ ہے۔
خیال رہے کہ رواں سال یکم جون کو ملک میں پیٹرولیم مصنوعات کی قیمتوں میں کمی کے بعد سے پیٹرول نایاب ہوگیا تھا اور دوبارہ قیمتوں میں اضافے تک پیٹرول پمپس پر پیٹرول کی قلت رہی۔
پیٹرول بحران کی انکوائری رپورٹ میں 9 آئل مارکیٹنگ کمپنیوں کو بحران کا ذمہ دار قرار دیا گیا تھا جبکہ لاہور ہائیکورٹ نے معاملے پر اعلیٰ سطح کا کمیشن بنانے کا حکم دیا تھا۔
