18 دسمبر ، 2020
بالی وڈ اداکارہ سوارا بھاسکر نے بھی بھارتی فلم انڈسٹری اور پنجاب کے مقامی اداکاروں کی طرح گزشتہ تین ہفتوں سے جاری کسانوں کے احتجاج میں شمولیت اختیار کر لی۔
بھارتی پنجاب کے گلوکار گپی گریوال نے حال ہی میں اس بات پر افسوس کا اظہار کیا تھا کہ بالی وڈ کی جانب سے کسانوں کے احتجاج کے حوالے سے آواز نہیں اٹھائی گئی۔
اب اداکارہ سوارا بھاسکر نے سوشل میڈیا پر اپنی تصاویر شیئر کیں جس میں وہ بھارتی حکومت کے نئے زرعی قوانین کے خلاف احتجاج میں شریک خواتین کے ہمراہ بیٹھی ہیں۔
بالی وڈ اداکارہ نے اپنی تصاویر کے علاوہ احتجاج میں شریک دیگر افراد کی بھی بہت سی تصاویر شیئر کیں اور کیپشن میں لکھا کہ 'واپس اپنی جگہ آنے کی تصاویر'
بھارتی دارالحکومت نئی دلی کی سرحد پر بھارتی پنجاب اور ہریانہ سمیت دیگر علاقوں سے تعلق رکھنے والے ہزاروں کسان مودی سرکار کے نئے زرعی قوانین کے خلاف گزشتہ کئی روز سے احتجاج کر رہے ہیں کیونکہ انہیں خوف ہے کہ نئے زرعی قوانین کے ذریعے سے انہیں کارپوریٹ سیکٹر کے رحم و کرم پر چھوڑ دیا جائے گا۔
خیال رہے کہ بھارتی اداکارہ سوارا بھاسکر ویرے دی ویڈنگ، رس بھری، تنو ویڈز منو اور بھاگ بھینی بھاگ سمیت کئی فلموں میں اداکاری کے جوہر دکھا چکی ہیں۔