29 دسمبر ، 2020 
امیتابھ بچن نے خاتون سے معافی مانگ لی
29 دسمبر ، 2020
بالی وڈ کے لیجنڈری اداکار امیتابھ بچن کا شمار فلمی انڈسٹری کی مصروف ترین شخصیات میں ہوتا ہے جوکہ فلموں کے ساتھ اشتہارات اور ٹی وی شوز میں بھی مصروف رہتے ہیں تاہم وہ سوشل میڈیا ہر مداحوں سے رابطہ رکھنا نہیں بھولتے۔
امیتابھ سوشل میڈیا پر پابندی کے ساتھ اپنی تصاویر، اقوال ذریں اور اپنے والد ہری ونش رائے بچن کے علاوہ دیگر افراد کی شاعری سوشل میڈیا پر شیئرکرتے رہتے ہیں۔
چند روز قبل امیتابھ نے ٹوئٹر پر چائے اور زندگی سے متعلق ایک دلچسپ نظم پوسٹ کی جسے 16 ہزار سے زیادہ افراد نے پسند کیا اور ایک ہزار سے زائد افراد نے کمنٹس کیے جن میں تیشا اگروال نامی ایک خاتون صارف بھی شامل تھیں۔
تیشا اگروال کا کہنا تھا کہ یہ میری نظم ہے، آپ کی پوسٹ میں دیکھ کر خوشی ہوئی، تاہم اگر اس نظم کے ساتھ میرا نام دے دیں گے تو میری خوشی اور فخر دگنا ہوجائےگا۔
خاتون کے کمنٹ کے بعد امیتابھ بچن نے ایک اور ٹوئٹ میں خاتون سے معذرت کرتے ہوئے لکھا کہ یہ تیشا اگروال کی نظم ہے جس کا کریڈٹ انہیں ملنا چاہیے، مجھے علم نہیں تھا،کسی نے مجھے بھیجی، مجھے لگا اسے پوسٹ کرنا چاہیے۔
خاتون شاعرہ نے امیتابھ کا شکریہ ادا کرتے ہوئے کہا کہ وہ ان سے معافی نہیں چاہتی تھی، یہ آپ کا بڑا پن ہے جس پرمیں شکر گزار ہوں۔
خیال رہے کہ چند ماہ قبل بھی امیتابھ نے ایک دوسرے شاعر کی نظم اپنے والد کے نام سے پوسٹ کردی تھی جس پر انہیں بعد میں معذرت کرنا پڑی تھی۔
مزید خبریں :
امریکی اداکار جان کراسنسکی سال 2024 کے پرکشش مرد قرار
13 نومبر ، 2024
