19 جنوری ، 2021
بالی وڈ اداکار ورون دھون کی ان کی دوست نتاشا دلال کے ساتھ شادی کی افواہیں گذشتہ چند سالوں سے چل رہی ہیں تاہم اب ان کی شادی کی تاریخ بھی سامنے آگئی ہے۔
بالی وڈ کے سینئر پروڈیوسر پہلاج نیہلانی نے انکشاف کیا ہے کہ ورون دھون رواں ہفتے ہی شادی کررہے ہیں۔
پہلاج نیہلانی کے مطابق انہیں شادی کا دعوت نامہ تو نہیں ملا تاہم انہوں نے سنا ہے کہ 23 یا 24 جنوری کو ورون کی شادی طے ہے، انہوں نے ورون دھون کے والد ڈیوڈ سے بات کی تھی تاہم انہوں نے شادی کا ذکر نہیں کیا۔
ان کا یہ بیان ایسے وقت سامنے آیا ہے جب بھارتی میڈیا میں پہلے سے ہی خبریں ہیں کہ ورون اور نتاشا ریاست مہاراشٹر کے علی باغ میں 24 جنوری کے دن شادی کریں گے۔
رپورٹس کے مطابق دونوں کے اہل خانہ گزشتہ کئی دنوں سے شادی کی تیاریوں میں مصروف ہیں جب کہ کورونا وائرس کی وجہ سے صرف مخصوص لوگوں کو ہی دعوت دی گئی ہے۔