'یہ ہماری کار ہے، یہ ہم ہیں اور یہ ہماری پارٹی ہو رہی ہے' پر گانا بھی تیار
13 فروری ، 2021
سوشل میڈیا پر آج کل تقریباً ہر چیز پر ہی میم بنالی جاتی ہے اور دیکھتے ہی دیکھتے وہ آگ کی طرح پھیل جاتی ہے جب کہ لاکھوں صارفین کی جانب سے اسے شیئر بھی کیا جاتا ہے۔
گزشتہ دنوں سے سوشل میڈیا پر ایک لڑکی کی ویڈیو خوب وائرل ہو رہی ہے جو منفرد انداز میں کہتی ہے کہ 'یہ ہماری کار ہے، یہ ہم ہیں اور یہ ہماری پارٹی ہورہی ہے'۔
یہ ویڈیو سوشل میڈیا پر اس قدر وائرل ہو گئی کہ صارفین کی جانب سے اس ویڈیو کی طرح ویڈیوز بنانے کا سلسلہ شروع ہو گیا۔
اس ویڈیو کی دیکھا دیکھی سوشل میڈیا صارفین کے علاوہ پاکستان شوبز انڈسٹری سے تعلق رکھنے والی معروف شخصیات اور یوٹیوبرز کی جانب سے بھی ویڈیو بنائی گئی۔
اب اس وائرل میم کی مقبولیت کا اندازہ اس بات سے لگایا جا سکتا ہے کہ گزشتہ روز بھارت سے تعلق رکھنے والے یوٹیوبر یشراج مکھاٹے نے اس پر گانا تیار کر لیا۔
یشراج مکھاٹے نے اس سے قبل بھارتی ڈرامہ سیریل 'ساتھ نبھانا ساتھیا' کے ڈائیلاگ 'رسوڑے میں کون تھا' پر گانا بنایا تھا جس کے بعد انہوں نے بگ باس سیزن 13 کی شہناز گل کے ڈائیلاگ 'توڈا کُتا ٹومی اور ساڈا کُتا کُتا' پر گانا بنایا تھا۔
اب انہوں نے پاکستانی لڑکی کی وائرل ویڈیو پر گانا تیار کیا ہے جسے سوشل میڈیا پر خوب پسند کیا جا رہا ہے۔
