نیا پاکستان ہاؤسنگ اسکیم کے تحت بلڈرز 25 لاکھ روپے میں گھر بناکردےگا، شہبازگِل
25 فروری ، 2021
وزیراعظم عمران خان کے معاون خصوصی برائے سیاسی ابلاغ شہباز گِل کا کہنا ہےکہ نیا پاکستان ہاؤسنگ اسکیم کے تحت پرائیویٹ بلڈرز 25 لاکھ میں چھوٹےگھر بناکر دیں گے۔
اسلام آباد میں پریس کانفرنس کرتے ہوئے شہباز گل کا کہنا تھا کہ شہری جب گھر بُک کریں گے تو حکومت 3 لاکھ روپے اکاؤنٹ میں جمع کرائےگی، ایسا نظام بنایا ہےکہ غریب آدمی گھربنائے تو دفتروں کے چکر نہ لگائے۔
ان کا کہنا تھا کہ صرف تنقیدہی نہیں کریں بلکہ عوام کو بتانا چاہیےکہ ملک میں کیا مثبت ہو رہا ہے، حکومت وقت نیاپاکستان ہاؤسنگ اسکیم لےکر آئی جس میں 50ہزار گھر بننے تھے، پاکستان میں تنخواہ کم اور رہائش مہنگی ہوتی ہے جو عام آدمی کا مسئلہ ہے۔
شہباز گل کا کہنا تھا کہ جو کرایہ غریب انسان ماہانہ دیتا تھا اب وہ اپنے گھر کی قسط دے گا، جن کی کم تنخواہ ہو تو وہ لاکھوں میں گھر کی پہلی قسط اور دیگر قسطیں کیسے ادا کرےگا، سرکارکو گھر بنانےکی نہیں بلکہ پہلے سسٹم ٹھیک کرنے کی ضرورت تھی۔
