26 فروری ، 2021 
پاکستان
ڈسکہ الیکشن: عثمان ڈار کا الیکشن کمیشن کا فیصلہ چیلنج کرنے کا اعلان
26 فروری ، 2021
وزیراعظم کے معاون خصوصی عثمان ڈار نے این اے 75 ڈسکہ کےضمنی الیکشن سے متعلق الیکشن کمیشن کے فیصلے کو عدالت میں چیلنج کرنے کا اعلان کردیا۔
جیو نیوز کے پروگرام 'آج شاہ زیب خانزادہ کے ساتھ' میں گفتگو کرتے ہوئے معاون خصوصی عثمان ڈار نے کہا کہ الیکشن کمیشن کا فیصلہ غیر قانونی ہے اسے عدالت میں چیلنج کریں گے، یہ ہمارے ووٹرز کی رائےکی نفی ہے۔
انہوں نے کہا کہ الیکشن کمیشن کا کوئی ایسا قانون نہیں کہ پریزائیڈنگ افسر کے دیر سے آنے پر الیکشن ملتوی کیا جائے۔
عثمان ڈار کا کہنا تھا کہ پہلے بھی ایسے ہی الیکشن ہوئے مگر پورے علاقے میں ری الیکشن نہیں ہوا، مسلم لیگ (ن) نے منظم مہم چلا کر الیکشن کو متنازع بنایا، ہم پہلے اپنے قانونی حق کے لیے لڑیں گے۔
