17 مارچ ، 2021 
لاہور کے 3 بڑے سرکاری اسپتالوں میں کورونا ویکسین ختم ہوگئی
17 مارچ ، 2021
صوبہ پنجاب کے دارالحکومت لاہور کے اسپتالوں میں کورونا سے بچاؤ کی ویکسین لگوانے والوں کا رش بڑھ گیا جس کے باعث 3 بڑے سرکاری اسپتالوں میں کورونا ویکسین ختم ہو گئی۔
لاہور کے میو اسپتال، جناح اور سروسز اسپتال میں کورونا ویکسین کا اسٹاک ختم ہوگیا اور ان اسپتالوں کے کورونا ویکسین سینٹرز کو تالے لگ گئے۔
ویکسی نیشن کیلئے آنے والے ہیلتھ پروفیشنلز بھی واپس چلے گئے۔
حفاظتی ٹیکہ جات پروگرام ( ای پی آئی) حکام کا کہنا ہے کہ لاہور کے سرکاری اسپتالوں کے سوا کسی ضلع میں ویکسین کی کمی نہیں جبکہ 4 ہزار کورونا ویکسین روزانہ ایکسپو سینٹر بھجوائی جا رہی ہیں۔
محکمہ صحت کے حکام کا کہنا ہے کہ 60 سال اور زائد عمر کے افراد کی کورونا ویکسینیشن کا سلسلہ ایکسپو سینٹر لاہور میں جاری ہے۔
اُدھر وزیر صحت پنجاب یاسمین راشد کا کہنا ہے کہ 60 سال سے زائد عمر کے افراد ایکسپو سینٹر سے ویکسین لگوائیں تاہم اسپتالوں میں سینیئر شہریوں کو ویکسین نہیں لگائی جائے گی۔
